Ц.БАЯР

Агаарийн тээврийн үйлчилгээ  эрхэлдэг  “ HUNNU AIR ” компани Улаанбаатар-Мөрөн чиглэлийн нислэгээ ирэх гуравдугаар сарын 1-нээс түр зогсоохоор болсон байна. Энэ ньХөвсгөл Улаанбаатар чиглэлийн хатуу хучилттай зам өнгөрсөн оны сүүлчээр ашиглалтад орсноос болж агаарын тээврээр зорчигчдын урсгал багассантай холбоотой ажээ. Тус чиглэлд “ HUNNU AIR ” компаниас өөр компани агаарын тээврийн үйлчилгээ эрхлээгүй байна. “ HUNNU AIR ” компанийн хяналтын мэргэжилтэн Б.Оюунтуяагаас энэ талаар тодруулахад   “ Нислэгийн зуны цагийн хуваарь гуравдугаар сарын сүүлчээр гарна. Гэхдээ ирэх гурван сард нислэг хийхгүй. Цаашдаа зургадугаар сарын 1 хүртэл нислэг үйлдэх эсэх талаар шийдвэр гараагүй байна. Гэхдээ зургаан сар хүртэл зогсоох магадлалтай байна. Учир нь зорчигчдын урсгал зуны улиралд их, өвлийн улиралд  эрс багасдаг. Нислэгээ зогсоохгүйн тулд өнгөрсөн аравдугаар сараас эхлэн Улаанбаатараас Мөрөн, Увсын чиглэлд давхар нислэгийг үйлдсэн. Он гарснаас хойш  Мөрөнгийн чиглэлд хоёр талдаа 1-2 зорчигчтой болсон тул манай компани дангаар нислэг үйлдэх боломжгүй болсон” гэв. Үүнээс шалтгаалж гуравдугаар сарын 3, 4 нд  Хөвсгөл далайд жил бүр болдог мөсний баярт оролцох гадаадын зарим  жуулчдад хүндрэл учирсан байна. Гэхдээ тус компани энэ үеэр жуулчдын компаниудын хүсэлтээр гуравдугаар сарын 2, 4-нд  нислэг хийж магадгүй гэлээ.  Одоогоор тус компани БНХАУ-ын Манжуур, Хайлаар хотуудад , орон нутгийн чиглэлд Увс, Ховд, Завхан, Дорнод, Хөвсгөл гэсэн чиглэлд нислэгээ үйлдэж байна. Мөрөнгөөс бусад чиглэлийн нислэг хэвийн үргэлжилж байгаа аж.

Эх сурвалж: www.polit.mn