Б.ТӨГС

“Саусгоби Сэндс” компанийн хуучин удирдлагууд болох Жастин Капла нартай холбоотой асуудлаар Монгол дахь Америкийн худалдааны танхим мэдэгдэл гаргалаа. Мэдэгдэлд “Монгол дахь Америкийн худалдааны танхим /АмЧам/ нь хоёр талын худалдааны харилцааг хөгжүүлэх, гадаадын хөрөнгө оруулалтыг дэмжих зорилготой байгууллага юм. АНУ-ын бизнес эрхлэгч Жастин Каплатай холбоотой асуудлаас үүдэн Монголын бизнесийн орчны тухайд гадаадын хөрөнгө оруулагчдад сөрөг ойлголт үүсч болзошгүй байгаад бидний зүгээс санаа зовниж байна. Ж.Каплагийн шударга шүүхээр хэргээ шийдүүлэх эрх илт зөрчигдсөн нь илэрхий байгаа учраас өдгөө явагдаж буй АНУ-ын Мянганы сорилтын сангаас Монголд үзүүлэх тусламжийн талаарх хоёрдугаар хэлэлцээрийг АмЧамын зүгээс дэмжих боломжгүй боллоо. Асуудал шударгаар шийдэгдсэн нөхцөлд тусламжийн хэлэлцээрийг үргэлжлүүлэхийг бүрэн дүүрэн дэмжихээ мэдэгдэж байна. Жастин Каплатай холбоотой асуудал шударгаар, цаг алдалгүй шийдэгдэж АмЧамын зүгээс Монголын эдийн засгийн өсөлт, хөрөнгө оруулалтыг дэмжих эрхэм чухал ажилдаа эргэн орох боломжтой болно гэж найдаж байна.