С.САРУУЛ

Говь-Алтай аймгийн Мэргэжлийн хяналтын газраас аймгийн зах, супермаркет, худалдааны төвүүдэд зарагдаж байгаа БНХАУ-аас орж ирсэн улаан алимнаас дээж авч шинжилгээнд хамруулжээ. Шинжилгээгээр алимнаас жимсний улаан хачиг илэрсэн байна. Жимсний хачиг нь нүдэнд харагддаггүй бөгөөд микроскопоор харжээ. Тиймээс Мэргэжлийн хяналтын газрын ажилтнууд зах худалдааны төвүүдэд зарагдаж байсан БНХАУ-аас орж ирсэн алимнуудыг хурааж авч устгалд оруулсэн аж.  Энэ талаар тус аймгийн Мэргэжлийн хяналтын газрын улсын байцаагч Г.Төгсбилэгээс тодруулахад “Аймгийн хэмжээнд жимс, жимсгэнэ худалдаалж байгаа бүх аж ахуй нэгж, хувь хүмүүсийн бүтээгдэхүүнээс дээж авч шинжилж байна. Одоогоор 29 аж ахуй нэгж шалгалтад хамрагдсан. Жимсний улаан хачиг илэрсэн 700 гаруй мянган төгрөгийн бүтээгдэхүүнийг устгалд оруулсан. Мөн энэ төрлийн жимс оруулж ирдэг хүмүүсийн барааг битүүмжилж шинжилгээнд хамруулж байна. Хачиг илэрсэн алимыг устгаж, эрүүлийг нь худалдаанд гаргах боломжтой. Жимсний улаан хачиг нь харшил, астма, бронхит үүсгэж, хүний биед хорт бодис дамжуулдаг. Цаашид цагаан сар хүртэл шалгалтаа үргэлжлүүлнэ” гэлээ.

Эх сурвалж: www.polit.mn