Т.ДАЛАЙ

Хан-Уул дүүргийн нэгдүгээр хороо буюу хуучин танктай хөшөөний суурин дээр   “Торгоны зам” нэртэй орон зайн баримлын цогцолбор нээгдлээ.  Өнөөдөр цогцолборын нээлт болж, нийслэлийн удирдлагууд оролцов.  Орон зайн баримлын төрлөөр “Торгоны зам” цогцолборыг “Хөх нар” контемпорари төвийн тэргүүн Ё.Далх-Очир бүтээжээ.  Цогцолборын нээлтийн үеэр уран бүтээлчээс зарим зүйлийг тодрууллаа.

-“Торгоны зам”  цогцолборыг та хэзээнээс хийж эхэлсэн бэ.  Ямар онцлогтой бүтээл болов?

-Орон зайн төрлөөр Монголд анх удаа энэхүү баримлыг урлалаа. Анх “Нүүдэл” хэмээх нэртэй байсан. Нийслэлийн удирдлагуудад бүтээлээ танилцуулаад хаана байрлуулж болох талаар асуусан.  Тэд хэлэлцээд хуучин танктай хөшөөний суурин дээр байрлуулж, нэрийг нь “Торгоны зам” хэмээн өөрчилсөн юм.  Таван тэмээтэй, жингийн цуваагаар “Торгоны зам”-ыг илэрхийлсэн бүтээл байгаа.  Одоо дахин дөрвөн тэмээ хийнэ.

-Дөрвөн тэмээг нь бас энд байрлуулах нь ээ?

-Тийм ээ. Ер нь жингийн цуваа гэдэг олон тэмээтэй байж төгс харагдах болов уу гэж бодсон.  Эхний таван тэмээгээ гурван сарын дотор хийж дуусгасан.  Одоо дөрвөн  дөрвөн тэмээг нь хавраас өмнө хийж дуусгах төлөвлөгөөтэй байна.

-Хотын орон зайн төрөл гэдгээ та жаахан тодруулахгүй юу. Энэ нь юугаараа онцлогтой вэ?

-Манай хотоор л дүүрэн талийгаачдын хөшөө дурсгал байна.  Харин “Торгоны зам” цогцолбор маань арай өөр. Тухайн талбайн орон зайдаа тодорхой үүрэг гүйцэтгэж байна.  Монгол тэмээ гэдэг хүчирхэг, тээвэрлэх чадвартай амьтан.  Үүнийг нийслэлдээ байрлуулснаар хотруу орох хөдөлгөөн, энергийн урсгал, түүхэн талаасаа ч ач холбогдолтой юм.

Эх сурвалж: www.polit.mn