С.САРУУЛ

ХСИС-ийн Дотоод хяналт, аюулгүй байдлын алба, Эмэгтэйчүүдийн зөвлөл, Сонсогч, суралцагчдын холбоо хамтран уламжлалт цагаан сарын баярыг угтан “Цагаан сар, цагаан үйлс” сэдэвт өдөрлөгийг зохион байгуулжээ. Хууль сахиулах салбарт чанартай боловсон хүчнийг бэлтгэхийн төлөө хичээн зүтгэж буй тус сургуулийн албан хаагч, сонсогчид энэ өдөр дүрэмт хувцсаа үндэсний хувцсаараа сольжээ. Мөн сонсогч, суралцагчдын холбооноос танин мэдэхүйн “АХА” тэмцээнийг  явуулж, Хилийн сургуулийн 421-дүгээр дамжааны сонсогч Ц.Эрдэнэбат авхаалж самбаа, оюун ухаанаараа бусдыгаа манлайлан тэргүүн байр эзэлжээ. Харин үндэсний хувцсаараа гайхагдсан 100 гаруй албан хаагчаас “Монголчууд монгол брэндээрээ гангарцгаая” уриаг эрхэм болгосон Онцгой байдлын сургуулийн 611-дүгээр дамжааны сонсогч Н.Баасанхүү хамгийн дэгжин хувцастай хүнээр тодорсон байна. Хоёрдугаар байрт ногоон дээлээр ижилссэн Шүүхийн шийдвэр гүйцэтгэлийн сургуулийн нэгдүгээр дамжааны түрүүч Д.Мягмардорж, А.Золзаяа нар шалгарсан бол удаах байрт Цагдаагийн сургуулийн Цагдаагийн эрх зүйн тэнхимийн багш, цагдаагийн дэд хурандаа Д.Идэрмөнх ногоон торгон хурган дээл, булганы арьсаар эмжиж оёсон үйтэн хуаран хүрэм, булган лоузан малгайгаар гангарсан байна.

Эх сурвалж: www.polit.mn