С.САРУУЛ

Нийслэлээс олдсон занданшуулсан шарил Монгол улс төдийгүй дэлхий нийтийг шуугиулж байна. Гадны хэвлэлүүд Итгэлт хамбын дараагийн төрөл, Буддагын төрөл  Монголын нийслэлээс олдлоо хэмээн бичсээр байна. Харин тус занданшуулсан шарилыг цагдаагийн байгууллагынхан илрүүлсэн даруйдаа Шүүхийн шинжилгээний үндэсний хүрээлэнд хүлээлгэн өгч Бурханч лам Г.Пүрэвбаатараар ахлуулсан  ажлын хэсэг  нарийн шинжилгээ хийж байгаа юм. Тэгвэл ажлын хэсгийнхэн ард олноо “Өвгөн Гэсэр лам” хэмээн өргөмжлөгдсөн их хувилгааны шавь Цорж Санжжавынх болохыг тогтоосон талаар цагдаагийн байгууллагын эх сурвалж мэдээллээ. Цорж Санжжав нь 200 гаруй жилийн өмнө амьдарч байсан бөгөөд Гэсэр багшаасаа 25 насаар дүү хүн байжээ.  

Занданшуулсан шарилыг бусдад худалдахаар нийслэлд авчраад байхад нь  цагдаагийн албан хаагчид илрүүлсэн байдаг. Занданшуулсан шарил Ховд, Архангай аймгаас  алдагдсан гэх таамаглалууд байсан ч Гэсэр ламын шавь Цорж Санжжавын бунхан Архангай аймгийн Цахир сумын нутагт байрлах Содномдаржаа уулын оройд байдаг байжээ. Тиймээс занданшуулсан шарил Архангай аймгаас алдагдсан бололтой. Гэхдээ ажлын хэсгийнхэн тус аймагт очиж алдагдсан үгүйг нь шалгах юм байна.

 Эх сурвалж: www.polit.mn