Г.БАТ-ӨЛЗИЙ

Монгол Улсаас анх удаа зурган цомог бүхий ном олон улсын зах зээлд хэвлэгдэн гарлаа. УИХ-ын гишүүн Н.Алтанхуягийн сүүлийн 20 жилийн турш Монгол орноор явж өөрөө зургийг нь  авсан “Шигтгээ мэт миний эх орон” номны талаар түүний зөвлөх Б.Ган-Очир болон номыг хийсэн ажлын багийнхан Үндэсний мэдээллийн төвд мэдээлэл хийлээ.  Номоо Германд хэвлүүлсэн бөгөөд аялал жуулчлалыг дэмжих, эх орноо сурталчлах зорилгоор гаргсан юм байна. Урьд нь гадаадын зурагчид Монголын тухай олон ном гаргасан байдаг боловч энэ ном нь монгол хүн өөрөө эх орныхоо тухай гадаад хэл дээр хэвлүүлснээрээ онцлог аж. Номонд дан зурагнаас гадна Монголд болдог томоохон үйл ажиллагаа, баяр ёслол, үндэсний наадам, үндэсний хувцас мөн зан заншил уламжлал цаашлаад Монгол орны байгалийн тухай, 21 аймгийн хамгийн үзэсгэлэнтэй газрууд зэрэг мэдээлэл багтжээ. Анх номонд оруулахаар 1500 зураг өгснөөс Германы тал 450 зураг сонгон авч, 305 хуудастай ном олон улсад нэгдүгээр сарын 15-наас худалдаанд гарчээ. Дашрамд хэлэхэд Монгол Улсад их нуур байдаггүй гэдэг гадаадынхны ойлголтыг энэ ном өөрчилсөн хэмээн Германы хэвлэлийн компанийн Монгол дахь төлөөлөгч, ажлын багийн гишүүн Г.Отгонжаргал хэлж байна. 

Эх сурвалж: www.polit.mn