С.УЯН

Сэлэнгэ аймгийн Мандал сумын нутаг дахь Ноён уулыг “Сентерра гоулд” компанид ашиглуулахыг “Ноён уулаа” аврах хөдөлгөөн, иргэний нийгмийн байгууллагууд болон нутгийн ард иргэд хүчтэй эсэргүүцэж байгаа. Тэд өнөөдөр Чингисийн талбай дээр, Бөөгийн холбоотой нэгдэн “Ноён уул”-ыг хамгаалахын тулд бөөгийн зан үйл үйлдлээ. Энэ үеэр цагдаагийн албан хаагчид тэднийг зохих ёсны зөвшөөрөл аваагүй хэмээн хориглож, бөө нарыг талбай руу оруулахгүй байсан юм. Гэвч бөө нар өөрсдийн сүсэг бишрэлээрээ зан үйлээ хийсэн юм. Энэ үеэр “Гамшгаас хамгаалах иргэний зөвлөл”-ийн тэргүүн Ж.Ганбаатар “Цагдаа нар зөвшөөрөл авсангүй хэмээн биднийг зогсоохыг оролдлоо. Бид зохих ёсны газар нь мэдэгдлээ өгч зөвшөөрөл авсан. Мөнгөний төлөө нүдээ өгөхөөс буцахгүй увайгүй улстөрчид сүүлдээ төрийн хуулиар түрий барьж цагдаа нарыг хүртэл хууль бус үйлдэлдээ уруу татаж байна. Бид амиа өгөөд ч хамаагүй эртний өвөг дээдэс, дурсгалын өв болсон Ноён уулыг хамгаална” гэлээ.

Мөн Хуагчин удган бөөт мөргөлийн төвийн тэргүүн Л.Загдаа “Бид наран ижийдээ мөргөж байна.Өөрөөр хэлбэл нарны гэрлээр дамжуулж өвөг дээдсийг сэрээж Ноён уулыг хамгааллаа. Бидний өнөөдрийн энэ зан үйл Ноён уулыг заавал хамгаалах болно. Хамгаалсан нь ч мэдрэгдэх болно” гэсэн юм.

Эх сурвалж: www.polit.mn