С.САРУУЛ

Өмнөд хөршид аялан тоглолтоор явж байсан “Шинэ үе” продакшны залуу жүжигчид энэ сарын 23-ны өглөө онгоцны буудал руу явж байгаад зам тээврийн осолд орсон харамсалтай хэрэг гарсан. Ослын улмаас залуу жүжигчин Т.Билгүүн амиа алдаж, тус хамтлагийн жүжигчид болох О.Алтансүх, А.Энхжин нар хүнд гэмтсэн. “Шинэ үе” продакшны зүгээс А.Энхжингийн хавирга гэмтэж, О.Алтсансүх толгойндоо гэмтэл авсан талаар мэдэгдсэн. Тэгвэл хоёр жүжигчний биеийн байдал дээрдсэн ч Хөх хотод эмчлүүлж байгаа юм байна.Харин талийгаач Т.Билгүүнийг өчигдөр өглөө ойр дотных нь хүмүүс сүүлчийн замд нь үдсэн.

Тухайн өдөр  хурд хэтрүүлж явсан ачааны машин манай жүжигчдийн сууж явсан машиныг хүчтэй мөргөснөөс болж осол гарчээ. Албаны эх сурвалжийн хэлж буйгаар осол гаргасан хятад жолоочийг БНХАУ-ын цагдаагийн байгууллага шалгаж байгаа бөгөөд шинжээчийн дүгнэлт болон урьдчилсан байдлаар осолд буруутай тус жолоочид 15 жилийн ял төлөвлөжээ. Мөн хятад жолоочийг цагдан хориод байгаа юм байна. Хятад жолооч 60 тоннын даацтай том оврын машинаар хурд хэтрүүлж явсан ба удахгүй хоёр улсын хууль хяналтын байгууллагынхан холбогдож энэхүү хэргийг шийдвэрлэхээр ярилцаж байгаа гэнэ.

Эх сурвалж: www.polit.mn