Үндэсний мэдээллийн төвд

Э.СҮРЭН

“Хүсэл зорилгоо нэгтгэе” үндэсний хөдөлгөөнөөс 2015 оныг Эв нэгдлийн жил болгон зарласан билээ. Тус хөдөлгөөнийхөн энэ ажлынхаа хүрээнд ирэх сарын 14-нд “Монголдоо сайхан амьдарцгаая” эв нэгдлийн чуулганыг зохион байгуулах гэж байгаа талаараа олон нийтэд  мэдээллээ. Уг чуулганд ШӨХТГ, Авилгатай тэмцэх газар, ЦЕГ, Хүний эрхийн үндэсний комисс, Шүүхийн ерөнхий зөвлөл, Төрийн албаны зөвлөл, Үйлдвэрчний эвлэл, Ажил олгогч эздийн холбоо, МАН-ын шинэчлэлийн хороо, МАХН, Улсын Ерөнхий прокрор зэрэг байгууллага оролцохоор болсон байна. “Хүн бүр тэмцлийн тухай ярьж байгаа энэ цаг үед эв нэгдлийн тухай ярих нь чухал юм. Монгол Улсын Ерөнхийлөгч Их хурлын чуулганы үеэр “Монгол монголоо дэмжье” гэж уриалсан. Энэ бол эв нэгдлийг илэрхийлж байгаа хэрэг. Монгол Улсын Ерөнхийлөгч эв нэгдлийг илэрхийлэгч байдаг. Энэ ч утгаараа бид аливаа тэмцлээс зайлс хийх болно. Зайлшгүй тохиолдолд тэмцэл гэдэг хатуу үгийг хэрэглэх ёстой. Эв нэгдлийн хамгийн хорт дайсан бол хуйвалдаан. Тиймээс бид хуйвалдааны эсрэг тунхаг бичиг гаргахаар ажиллаж байна” хэмээн Хүсэл зорилгоо нэгтгэе хөдөлгөөнхий тэргүүн Х.Бат-Ялалт ярьсан юм. Эв нэгдлийн чуулганы маргааш буюу ирэх сарын 15-нд бүх нийтийн эв нэгдлийн гүйлтийг зохион байгуулах ажээ. Гүйлт Үндэсний цэцэрлэгт хүрээлэнгээс Чингисийн талбай хүртэл 3.2 км үргэлжлэх бөгөөд хүн бүрт нээлттэй гэнэ. Үүнээс гадна “Хуйвалдаангүй амьдарцгаая” фото болон гар зураг, эссэ, илтгэлийн уралдаан зохион байгуулах юм байна. Энэ талаарх дэлгэрэнгүй мэдээллийг 70110070 дугаараас авах боломжтой юм.