С.САРУУЛ

Нийслэлийн прокурорын газрын ял эдлүүлэх ажиллагаанд тавих хяналт хариуцсан хэлтсээс нийслэл, дүүргийн прокурорын газруудын харьяа хорих анги болон баривчлах байрнуудад гарсан гэмт хэргийн судалгааг хийжээ. Судалгаагаар өнгөрсөн онд дүүргийн прокурорын газруудын хяналтын харъяа хорих ангиудад нийтдээ 23 гэмт хэрэг гарчээ.  Гэмт хэрэг гарсан хорих ангиудыг анги тус бүрээр нь авч үзвэл: хорих 407 дугаар ангид хоёр, хорих 409 дүгээр ангид нэг, хорих 421 дүгээр ангид хоёр,  цагдан хорих 461 дүгээр ангид дөрөв, хорих 429 дүгээр ангид нэг, хорих 411 дүгээр ангид хоёр, хорих 417 дугаар ангид хоёр, хорих 427 дугаар ангид дөрөв, хорих 415 дугаар ангид таван гэмт хэрэг  гарсан байна. Үүнээс хүнд гэмт хэрэг тав, хүндэвтэр гэмт хэрэг 11, хөнгөн гэмт хэрэг долоо гарсан бөгөөд есөн хэргийг шүүхээр шийдвэрлэж, долоон хэргийг хэрэгсэхгүй болгож, зургаан хэрэг мөрдөн байцаалтын шатанд байгаа аж.   Хорих ангиудад гарсан гэмт хэргүүд нь ялтны харуул хамгаалалтанд тавих хяналт сул, шийдвэр гүйцэтгэх байгууллагын албан хаагчдын ажлын хариуцлага хангалтгүй, ялтны дунд зохиох сургалт, хүмүүжил, нийгэмшүүлэх ажил шаардлагын хэмжээнд хүрэхгүй байгаа мөн ялтнуудын дунд гэмт хэрэг, зөрчлөөс урьдчилан сэргийлэх талаар хорих ангийн захиргаанаас зохион байгуулж буй ажил хангалтгүй байгаатай шууд холбоотой юм байна.

Эх сурвалж: www.polit.mn