С.САРУУЛ

Батлан хамгаалахын сайд Ц.Цолмон өнөөдөр Монголын оюутны холбооны төлөөлөлтэй уулзжээ. МУИС, ШУТИС, УБИС, ХААИС зэрэг арав  гаруй сургуулийн оюутнууд энэ үеэр салбарын сайдад цэргийн алба хаагчдын дунд сагсан бөмбөг болоод уран илтгэлийн тэмцээн зохион байгуулах хүсэлтээ дуулгажээ.Өөрөөр хэлбэл  уралдаанд түрүүлсэн хугацаат цэргээр  их, дээд сургуулиудад эх орны тухай, цэргийн алба хаах ач холбогдлын тухай илтгэл тавиулж залууст эх оронч хүмүүжил "олгох" боломж байгаа гэв. Түүнээс гадна "Оюутан цэрэг" хөтөлбөрийг дэмжиж буйгаа илэрхийлээд өөрсдөө ч гэсэн энэ хөтөлбөрөөр цэргийн алба хаах сонирхол дүүрэн байгаа гэцгээв. Батлан хамгаалахын сайд Ц.Цолмон оюутнуудын саналыг дэмжих боломжтой хэмээгээд "Цэргийн алба хаана гэдэг бол иргэн хүн бүрийн эзэмших ёстой, дээдлэх ёстой зүйл. Эх орноо хайрлая гэвэл эр цэрэг болох хэрэгтэй, цэргийн алба хаах хэрэгтэй. Цаашдаа “Оюутан цэрэг” хөтөлбөр улам боловсронгуй болж  хэрэгжинэ. Хөтөлбөрт идэвхтэй хамрагдаарай" гээд сурлагын өндөр амжилт хүссэн юм.

Эх сурвалж: www.polit.mn