С.САРУУЛ

Баян-Өлгий аймгийн Бугат сумын хоёр иргэн  энэ сарын 22-нд мөнгөн усанд хордсон. Энэ талаар МХЕГ-ын Хэвлэл мэдээлэл, олон нийттэй харилцах хэлтсийн дарга Л.Итгэлтөгсөөс тодрууллаа.

-Юунаас болж иргэд мөнгөн усанд хордсон юм бол. Энэ талаар тодруулаач?

-Баян-Өлгий аймгийн Бугат суманд 25 настай Е, 13 настай Н нар мөнгөн усанд хордсон хэрэг гарсан. 25 настай Е нь энэ сарын 17-ны өдрөөс толгой нь эргэн халуурч, биеэр нь улаан тууралт гарсны улмаас сумынхаа эмнэлэгт хандсан байна. Өвчтөн өнгөрсөн оны аравдугаар сард мал нядалж байхдаа баруун гарын дунд хурааг гэмтээж, эмнэлэгт арав хоног эмчлүүлээд гарсан гэсэн. Тэгээд дахин эмчлүүлсэн хуруугаа гэмтээгээд оточ Х.Аблайханд хандан зургаан удаа мөнгөн усны эмчилгээ хийлгэсэн ч биеийн байдал улам дордож, сэхээн амьдруулах тасагт хүргэгдсэн байна. Харин түүний дүү болох 13 настай Н бөөлжиж, халууран, биеэр нь тууралт гарч эмнэлэгт хандан эмчлүүлж байгаа. Эмчийн үзлэгээр дээрх хоёр хүн нь мөнгөн усны хордлого авсан нь тогтоогдсон.

-Хүмүүсийн биеийн байдал хэр байгаа бол?

-Эрчимт эмчилгээ хийх зайлшгүй шаардлагатай тул Улаанбаатар хотын Хордлогын төвд эмчлүүлэх хэрэгтэй байгаа ч биеийн байдал муу байгаа учраас  аймгийнхаа эмнэлгийн сэхээн амьдруулах тасагт эмчлүүлж байна. Аймгийн мэргэжлийн хяналт,  Онцгой байдал, Цагдаа, Тагнуулын байгууллага хамтран шалгалт хийхэд оточ Х.Аблайхан нь ясны идээт үрэвслийн эмчилгээг мөнгөн ус ашиглан хийдэг болох нь илэрсэн. Уг эмчилгээг арван  жил хийсэн бөгөөд нэг сард дунджаар таван хүнд хийдэг байна. Иргэдийн хүсэлтээр эмчилгээ хийдэг гэх боловч эмчлүүлсэн хүний бүртгэл, тэмдэглэл байхгүй байсан. Тэгэхээр сувилагч мэргэжилтэй хэрнээ зөвшөөрөлгүй эмчилгээ хийсэн. Мөн хаяг, шошгогүй, гарал үүсэл, зориулалтын бус, хувь хүнээс авсан мөнгөн ус, химийн бодис, тосоор эмчилгээ хийсэн үндэслэлээр цагдаагийн байгууллага шалгаж байгаа.

Эх сурвалж: www.polit.mn