Ц.БАЯР

“Дунд сургуулиудыг зун хичээллүүлдэг болгоё ”санаачилгыг Ардчилал, шударга ёс, Монголын эмэгтэйчүүдийн холбооноос гаргасан байна. Харин дунд сургуулийн төгсөх анги буюу 11, 12 дугаар ангиудыг өвөл хичээллүүлж болох юм гэж тэд хэллээ. Хэрвээ сургуулиудыг зун ажиллуулдаг болвол улс орны хөгжил болоод эдийн засагт, гэр бүлийн хөгжилд олон эерэг үр дүн гарах талаар санаачлагчид хэлж байна. Тухайлбал, өвлийн улиралд хүүхдүүд ханиад томуугаар өвчлөх нь эрс багасч үүнийгээ дагаад хүүхдийн эмнэлгийн ачаалал буурна. Мөн хальтиргаа гулгаатай үед зам тээврийн осолд өртөх нь багасах, өвлийн хүйтэнд өглөө эрт, орой харанхуйгаар сургуульд явж нохойд хазуулах, гэмт хэргийн золиос болохгүй байх зэрэг олон эрсдлийг бууруулна гэж үзэж байна. Түүнчлэн монголчууд долоо хоногт хоёр өдөр амардаг, дээр нь нэмээд зуны гурван сар амарч, найр наадам хэсч өнгөрөөдөг явдал багасах гэнэ. Нөгөө талаар хүүхдүүд зун морь унаж, мориноос унаж бэртэх цаашлаад амь насаа алдах хүртэл харамсалтай хэргүүд гардаг байдал зогсоно гэлээ.  Хот суурин газрын иргэд өвлийн улиралд утаагүй орчинд хөдөө гарч хүүхдүүдээ амраах, цана чаргаар гулгуулах зэрэг шинэ боломж нээгдэнэ. Сургуулийн урсгал засварыг өвөл ч хийж болно. Ингэснээр өвөл ажилгүй суудаг барилгынхан ажилтай болно зэргийг хүртэл тооцоолжээ. Уг санаачилга хэдийгээр сөрөг зүйлтэй тулгарах хэдий ч эерэг тал нь давуу учраас бид санаачилгаа шийдвэрт нөлөөлтөл ажиллана гэдгээ холбооны тэргүүн Л.Сэлэнгэ хэллээ. Тэд энэхүү санаачилгаа албан ёсоор БСШУЯ-нд бичгээр хүргүүлэх юм байна.

Эх сурвалж: www.polit.mn