С.САРУУЛ

Улаанбаатар хотын хүн амын хаврын улирлын хэрэгцээнд зориулан махны нөөц бүрдүүлэх, хадгалах, ангилан савлах, худалдаалах үйл ажиллагааг бүрдүүлэх компаниудтай холбогдох яам агентлагууд гэрээ байгуулан хамтарч ажиллаж байгаа. Энэ жил “Эи Эн Ди Эм”, “Мах импекс”, “Баатарууд тэнгэр”, “Мах маркет” компаниуд тус бүр 3000 тонн мах нөөцөлжээ. Харин нөөцийн махыг удахгүй худалдаанд гаргана хэмээн Хүнс, хөдөө аж ахуйн яамнаас мэдэгдээд байсан. Тэгвэл ХХААЯ, МХЕГ, ОБЕГ-ийн төлөөллүүд өнөөдөр нөөцийн махны үйлдвэрүүдтэй танилцахад үйлдвэрүүдийн зүгээс асуудалтай байгаагаа хэллээ.Учир нь энэ оны төсвийн тодотголоор нөөцийн махны үйлдвэрүүдэд нэг кг тутамд нь өгдөг 1000 төгрөг буюу үйл ажиллагааны зардлыг танасан нь талуудыг дахин ширээний ард суухад хүргэж байгаа гэнэ.Мөн нөөцийн мах бэлтгэгч компаниудын өмнөх жилийн  үйл ажиллагааны зардлаас 4.5 тэрбум төгрөгийг олгоогүй байгаа аж. Хэрэв цаашид яамны зүгээс хувийн хэвшлийнхэнд үйл ажиллагааны зардлыг төсөвт танаснаар буюу өгөхгүй бол нөөцийн махны үнийг үйлдвэрлэгчид өөрсдөө тогтооно гэдгийг энэ үеэр хэлсэн юм. Аль аль талдаа асуудалтай байгаа энэ үед зөвшилцөж чадахгүй бол тариаланчид шиг хэвлэлийн хурал зарлаж, жагсаал цуглаан хийх бололтой.

Эх сурвалж: www.polit.mn