Т.ДАЛАЙ

Нийслэлийн иргэнд гэр бүлийн зориулалтаар газар өмчлүүлэх хоёрдугаар ээлжийн цахим бүртгэл өнөөдөр 12:00 цагаас эхэлнэ.  Нэгдүгээр ээлжтэй нэгэн адил системийн дагуу явагдах бөгөөд www.umch.ub.gov.mn хаягаар иргэдийн газар өмчлөх хүсэлтийг хүлээн авах юм. Мөн нэгдүгээр ээлжинд цахимаар өргөдлөө гаргасан ч сонгогдоогүй бол тухайн үеийн кодоороо дахин бүртгүүлэх юм байна. Цахим өргөдөл өгөхөд танд бэлэн байх мэдээлэл овог нэр, регистр, утасны дугаар, гэрийн хаяг. Энэ удаа таван байршилд иргэдийн өргөдлийг авах бөгөөд Нийслэлийн өмчийн харилцааны газраас тухайн газруудад очиж хэмжилт, судалгааг хийгээд иржээ. Ингэснээр нэгдүгээр ээлжийн газар өмчлөлийн явцад гарсан шиг гуу, жалга, гол таарах газар давхцах зэрэг хүндрэлүүд гарахгүй гэж үзэж байгаа ажээ.   Өнөөдрөөс эхлэн 15 хоног үргэлжлэх цахим бүртгэлээр Сонгинохайрхан дүүргийн Эмээлт уулын баруун хоолой, Баянзүрх дүүргийн Улиастай дахь Их цуурай, Бага цуурайн ам, Багануур дүүргийн Тариан булгийн хоёрдугаар хэсэг, Баганхангай дүүргийн Хангайн хөндийн нэгдүгээр хэсэг зэрэг байршлуудаас сонгон өргөдлөө өгөөрэй.  Мөн нэгдүгээр ээлжээс сонгогдоогүй үлдсэн 1400 гаруй байршилд дахин сонгон шалгаруулалт явагдах юм байна.

Эх сурвалж: www.polit.mn