Ц.БАЯР

Өнгөрсөн жилийн цагаан сараар хүннү  захтай дээл загвар болж байсан энэ жил энгийн өөрөөсөө монгол захтай , өнгө дагуу бүстэй дээл загвар болох төлөвтэй байна. “Мишээл- Экспо” төвд өчигдрөөс эхэлсэн цагаан сарын өргөтгөсөн  үзэсгэлэн худалдаан дээр голдуу ийм загварын дээлнүүд байлаа.  Үзэсгэлэнгээ гаргаж байгаа компаниудын загвар зохион бүтээгчид ч энэ талаар хэлж байсан юм. Үзэсгэлэн худалдаанд монгол үндэсний дээл хувцас,  малгай, гутал хийдэг  200 гаруй аж ахуйн нэгж оролцжээ. Монгол ноолууран,  япон, солонгос, хятад, энэтхэг  төрөл бүрийн чамин тансаг торго, даавуугаар өнгө размерийн өргөн сонголттой  хос дээл, хүүхдийн дээл, дан дээл зэргийг сүүлийн үеийн загварт оруулан урласан байв. Үнийн хувьд том хүний хос дээл хийц материал чанараасаа шалтгаалан 350-550 мянган төгрөг бол хүүхдийн дээл 35-50 мянган төгрөгийн хооронд байлаа. Харин дан эрэгтэй, эмэгтэй дээл 150-250 мянган төгрөгийн үнэтэй байна. Энэ жилийн дээлний өнгөны хувьд завсрын өнгө зонхилох ажээ. Тухайлбал, хос дээл яг ижилхэн өнгөтэй биш эрэгтэй дээлний өнгөнөөс эмэгтэй дээлнийх нь өнгө бага зэрэг ууссан байх жишээтэй. Түүнчлэн булга, минжин  хүрэм гурван сая бол  энгийн  хантааз, хүрэм 35-40 мянган төгрөгийн үнэтэй байна.  Үзэсгэлэнд хөдөө орон нутгаас оролцож байгаа иргэд ч байна. Тухайлбал, өвөрхангай аймгийн оёдолчид ирсэн байсан юм. Эднийх солонгос нэхийгээр монгол загварын дээл урласан нь содон харагдав. Нэхий дээлэндээ  монгол хээ товойлгон урласан нь үйтэн хуар дээлийг санагдуулам. Энэхүү дээл хосоороо нэг сая төгрөгийн үнэтэй. Мөн бүх төрлийн ноолууран бүтээгдэхүүн 20-50 хувийн хямдрал зарлажээ. Үзэсгэлэн худалдаа цагаан сар хүртэл үргэлжилнэ.

Эх сурвалж: www.polit.mn