Б.БАРС

Өвөрмонголын өөртөө засах орны Дөрвөд сумын малчин иргэд мягмар гаригаас эхлэн Бээжинг зорих болсон тухай “Radio Free Asia” агентлаг мэдээлжээ. Тэдний бэлчээр нутгийг 2011 онд Хятадын ардын чөлөөлөх армид шилжүүлэн өгөөд Хөх хот руу нүүлгэж багагүй нөхөн төлбөр өгөхөөр амласан аж. Гэвч амласандаа хүрээгүй гэнэ.

Тус сумын малчин Алтанхул ярихдаа, “Бидний бэлчээрийг 2011 оноос эхлэн Хятадын ардын чөлөөлөх армийн Бээжингийн цэргийн тойрогт шилжүүлэх болсон. Бид 2012 оны зургадугаар сар гэхэд бүгд газар нутгаа орхиж нүүсэн юм. Нөхөн төлбөрт нийт 1.8 сая юань (290 530 ам.доллар) буюу хүн тус бүрт дунджаар 96 мянган юань (15 500 ам.доллар) өгнө гэсэн ч өнөөг хүртэл бид 147 мянган юань (23 730 ам.доллар) л дундаа хувааж авсан” гэжээ.

Малчид үлдсэн нөхөн төлбөрөө авах, эсвэл нутагтаа эргэж нүүхийг хүсэн төрөлх Дүрвэд сумынхаа захиргаанд удаа дараа хандсан ч тусыг эс олсон байна. Тэд мөн Хятадын төв телевиз, Дээд шүүхэд хандаад ч зорьсондоо хүрээгүй аж. Иймээс таван жил хөөцөлдөөд шийдэж чадаагүй асуудлаа Хятадын Засгийн газарт тавихаар зориг шулуудан хэдэн арваараа Бээжинд ирсэн байна.

Эх сурвалж: www.polit.mn