С.САРУУЛ

АТГ-аас "Саусгоби сэндс" ХХК-тай холбоотой хэргийг шалгаж эхлээд багагүй хугацаа өнгөрсөн. Тэгвэл уг хэргийн мөрдөн байцаалтын ажиллагаа дуусч, прокуророос хянан, Дүүргийн эрүүгийн хэргийн анхан шатны хоёрдугаар шүүхэд шилжүүлсэн байна. “Саусгоби сэндс” ХХК-ний гүйцэтгэх захирал Жастин Капла, тус компанийн санхүүгийн ерөнхий менежерээр ажиллаж байсан Филиппин улсын иргэн Хиларион В.Кажуком нар бүлэглэн 35 орчим тэрбум төгрөгийн татвараас зайлсхийсэн нь мөрдөн бйацаалтын явцад тогтоогдсон байна. Тиймээс энэ хэрэгт тус компанийн гүйцэтгэх захирал Жастин Капла, тус компанийн санхүүгийн ерөнхий менежерээр ажиллаж байсан Филиппин улсын иргэн Хиларион В.Кажуком ЖР, санхүү нягтлан бодох бүртгэлийн ерөнхий менежерээр ажиллаж байсан Кристобэл Ж.Дэвид нарыг шүүгдэгчээр татсан байна.

Тэдэнд Эрүүгийн хуулийн 166 дугаар зүйлийн 166.2-т зааснаар яллах дүгнэлт үйлджээ. Тус зүйл ангид /166.2 Татвар төлөхөөс зайлсхийх хэргийг давтан үйлдсэн, эсхүл татвар ногдох онц их хэмжээний орлого, эд хөрөнгө, ажил, үйлчилгээ, бусад зүйлийг нуусан бол эд хөрөнгийг хурааж, хөдөлмөрийн хөлсний доод хэмжээг хоёр зуун тавин нэгээс таван зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл таваас дээш найман жил хүртэл хугацаагаар хорих ял шийтгэнэ" гэж заасан байдаг. Энэ хэргийн мөрдөн байцаалт эхэлснээс хойш буюу 2012 оны тавдугаар сарын 8-ны өдрөөс хэргийн холбогдогч нарт мөрдөн байцаалтын шатанд гадагш явж болохгүй тухай баталгаа авах таслан сэргийлэх арга хэмжээ авагдсан ба Монгол улсын хилээр нэвтрэн гарах эрхийг түдгэлзүүлсэн байна.Мөн Үл хөдлөх хөрөнгө болон “Саусгоби сэндс“ ХХК-ийн Хаан, Голомт, Худалдаа Хөгжлийн банкин дахь дансуудыг битүүмжилсэн байгаа аж.

Эх сурвалж: www.polit.mn