Т.ДАЛАЙ

Хотын төв зам  дагуу зөвшөөрөлгүй хэд хэдэн рекламны самбар бий.  Хотын захиргааны зүгээс хоёр жилийн өмнөөс буулгах шийдвэр гарсан ч одоог хүртэл буулгаж чадаагүй. Жишээлбэл Мон-Ураны хашаанд байрлах самбар, Баруун дөрвөн замд байдаг Ханбүргэдэй худалдааны төвийн мэдэлд байдаг самбарыг буулгаж чадаагүй. Эрх дархтай эдгээр байгууллагууд Хотын даргын шийдвэрийг үл тоосон.  Гэтэл саяхан Улаанбаатар  Ерөнхий менежерийн дэргэдэх Гадна зар сурталчилгааны зөвлөл хуралдаж 2015 оны үйл ажиллагааныхаа төлөвлөгөөг хэлэлцлээ. Уг зөвлөл нь Улаанбаатар хотын хэмжээнд гадна сурталчилгааны  журмын хэрэгжилт, норм дүрэм, зай хэмжээнд нь нэгдсэн хяналтыг тавин ажиллах юм. Дүүрэг бүр өөрийн нийтийн эзэмшлийн гудамжуудад ямар хэмжээтэй хэдэн ширхэг сурталчилгааны самбар байрлуулах боломжтойг зөвлөлийн хурлаар хэлэлцэж, зай хэмжээ, төлөвлөлтөө хийж олон нийтэд нээлттэй зарлах юм. Ингэснээр Улаанбаатар хотын нутаг дэвсгэрт гадна сурталчилгааны байгууламж байрлуулахад дагаж мөрдөх журмын хэрэгжилт хангагдах боломж бүрдэнэ. Мөн Зайсангийн гудамж, Энэбиш, Ард Аюушийн өргөн чөлөө гэх мэт гудамжуудад байрлуулсан зөвшөөрөлгүй болон шаардлага хангахгүй сурталчилгааны самбаруудыг буулгахаар шийдсэн байна.

 Эх сурвалж www.polit.mn