Ц.БАЯР

Хайгуулын тусгай зөвшөөрөл авах хүсэлт, өргөдлийг энэ сарын 26-наас эхлэн Ашигт малтмалын газарт хүлээн авахаар боллоо. Өргөдөл материалаа өгөхийн өмнө цахимаар бүртгүүлж дугаар авах шаардлагатай ажээ.  Дугаарын дагуу материалаа өгнө.  Өргөдлийн дагуу тухайн орон нутгаас санал асуулга явуулж нэг сарын дотор хариуг өгөхөөр болжээ. Хайгуулын тусгай зөвшөөрлийг олгохдоо цахим болон сонгон шалгаруулалтаар зэрэг олгож эхлэхээр бэлтгэсэн гэдгээ Уул уурхайн яамнаас мэдээллээ. Цахимаар олгоход тухайн зөвшөөрөл хүссэн байгууллага VPN гэсэн төхөөрөмжийг худалдан авч хайгуулын тусгай зөвшөөрөл олгох цахим сайт руу холбогдож мэдээллийг тогтмол авах боломжтой болж байгаа юм байна. Өмнө нь цахимаар зөвшөөрөл олгох ажлыг туршилтаар явуулсан боловч систем нь хакердуулсан тул зогсоосон гэнэ. Энэ удаа дахин шинэчлэл хийсэн учраас  системийн алдаа гарахгүй гэдгийг яамныхан хэлж байна. Хайгуулын тусгай зөвшөөрлийг Монгол Улсын нутаг дэвсгэрийн 19.9 хувь буюу 31 сая га талбайд олгоно. Үүнээс 20.9 га талбайд өргөдлийн журмаар сонгон шалгаруулалтаар 10.1 га талбайд тусгай зөвшөөрөл олгоно.  Хориглосон талбай нийт нутгийн 71.5 хувийг эзэлж байгаа ажээ. Одоогоор өнгөрсөн оны арванхоёрдугаар сард сонгон шалгаруулалтаар  зарласан 18 талбайн нэр бүхий таван га талбайд 13 оролцогч саналаа ирүүлээд байгаа юм байна. Он гарсаар нэг талбайд дахин сонгон шалгаруулалт зарлаад байна. Эхний ээлжинд нийтдээ 9 сая га талбайд хайгуулын тусгай зөвшөөрлийг эмх цэгцтэй, төлөвлөгөөтэй  олгоно гэдгийг Уул Уурхайн сайд Р.Жигжид өнөөдөр хийсэн мэдээлэлдээ онцоллоо.        

Эх сурвалж: www.polit.mn