Ц.БОЛОР

Өдгөөгөөс 760 жилийн тэртээд буюу 1255 онд Мөнх хааны залж авчирсан улааны шашны Гармаба хийдийг дахин сэргээж байгаа тухай манай сонин урьд нь мэдээлж байсан. Уг хийд нийслэлийн Баянгол дүүрэгт сүндэрлэн босч буй.

Мөнх хааны олон зууны өмнө монгол нутагтаа залсан шашны уг урсгалыг Гандантэгчинлин хийдийн цорж лам, гавж Г.Диваасамбуу, түүний хүү, гэвш Д.Тайвансайхан нар өөрсдийн санаачилга, хүчин зүтгэлээр сүсэгтэн олондоо өргөн талбиулж байгаа нь энэ.

Улааны шашин нь Буддын шашны хоёр дахь том урсгал юм. Дилав хутагт, Нарванчин гэгээн, Мила Богдын сургаал номлол энэхүү урсгалд нэвт шингэсэн байдаг.

Хатуу хүчтэй тарнийн хариулга,  засал номын уншлага үйлдэхээс гадна буяны цагаалга, өглөгийн үйлийг тасралтгүй хийх таван давхар номын өргөө бүхий Гармаба хийд нь “хонхор газрыг хорголоороо дүүргэн баяжуулдаг” хонь  жилийн босгон дээр нээлтээ хийх аж.

Гармаба ламтан нь Мөнх хааны хөлийн өвчнийг эдгээж өгсөн буянт шидтэн учраас хийдийг нь нутагтаа байгуулсан тухай Поло Карпини дурсамж тэмдэглэлдээ өгүүлсэн байдаг билээ.

Нэмж сонирхуулахад, Г.Диваасамбуу гавж их хэлмэгдүүлэлтийн дараа өөрт хадгалагдаж байсан таван машин ном судар, бурхан шүтээн, эд хэрэглэлээ Гандантэгчинлин хийдэд өргөж, дахин сэргээсэн бурхны үнэнч  шавь нарын нэгэн юм.

Эх сурвалж: "Зууны мэдээ" сонин