Т.ДАЛАЙ

Хүүхдүүд эцэг эхтэйгээ явж байх үедээ гэмтэж байгаа нь томчуудын тавих хараа хяналт сул, замын хөдөлгөөнд хэрхэн аюулгүй оролцох талаар зааж зөвлөдөггүй, тээврийн хэрэгслээр хүүхдийг тээвэрлэхдээ хамгаалах бүс, хамгаалалтын суудлыг нь хэрэглэхгүй байгаа нь хүүхдийг  осолд өртүүлж,  амь нас эрүүл  мэндийг нь хохирооход хүрч байна гэж Замын цагдаагийн газраас мэдээллээ.  Учир нь 2015 оны эхний хагас сарын байдлаар зам тээврийн осолд нийт 21 хүүхэд өртөж, хоёр хүүхэд нас барж 19 хүүхэд хүнд, хөнгөн гэмтсэн байна. Замын хөдөлгөөнд оролцож байгаа жолооч, эцэг эхчүүд хамгаалах бүс, хамгаалах суудлыг цагдаагаар шаардуулж, арга хэмжээ авахуулахаас сэргийлж, цагдаагийн нүдийг хуурах байдлаар хэрэглэдэг нь өөрсдийгөө болон хайртай үрсээ аюулд учруулж байгаа хэрэг юм. Саяхан Сүхбаатар дүүргийн нутагт “Исузу” маркийн автомашинд 1.5 настай хүүхэд дайруулж, амь нас нь хохирсон ноцтой хэрэг гарсан. Тиймээс эцэг эхчүүд үр хүүхэддээ тавих хараа хяналтаа сайжруулах, хүүхдээ хаана, хэнтэй яваа, хэрхэн замын хөдөлгөөнд оролцож байгаа талаар байнга анхаарал тавьж, хэлж зөвлөн, өөрсдөө үлгэр дууриалал үзүүлэн замын хөдөлгөөнд соёлтой оролцохыг Замын цагдаагийн газраас анхааруулж байна.

Эх сурвалж www.polit.mn