Ч.ГАНТУЛГА

Сэтгүүлч, зохиолч Б.Цогнэмэхийн “Тэнгэрийн хүү” жүжгийн зохиол ном болон хэвлэгджээ. Анх 2010 онд шилдэг жүжгийн зохиолоор шалгарч, тайзны бүтээл болсон тус жүжигт Монголын анхны тулгар төр, Хүннү гүрэн Модун Шаньюйгийн тухай өгүүлдэг билээ. Монголын театрын түүхэнд өөр нэгэн өнгийг тодруулж, үзэгчдээс өндөр үнэлгээ авсан тус бүтээл одоо ч үнэ цэнээ алдаагүй. Тиймээс ном болгон ийн хэвлүүлжээ. Номын тухай Төрийн соёрхолт, найруулагч Н.Наранбаатар “Жүжиг бол зөвхөн зохиолчоос гадна найруулагчийн санаа, шийдлээс бүтдэг. Харин ном бол тэр чигээрээ зохиолчийн дотоод ертөнц юм. Тиймээс энэ ном зохиолч Б.Цогнэмэхийн ертөнцийг илүү нээсэн” гэж сэтгэгдлээ илэрхийлсэн юм. “Тэнгэрийн хүү”-тэй хамт Сэтгүүлзүйн баримтат  уран зохиолын төрөлд хамаарах “Цагаан морины домог” ном уншигчдын хүртээл болж буй тухай танилцууллаа. Номын редактороор сэтгүүлч Б.Батбилэг ажиллажээ. Зохиолч энэхүү номоо хайртай, дотны хүмүүстээ зориулсан тухайгаа ярьсан юм. Жишээлвэл номд “Бурхан” хэмээх бүлэг байна. Үүнийг  тэрээр өөрийн багш зохиолч Ардын уран зохиолч Д.Урианхайд зориулжээ. Энэ ном саяхан болсон “Алтан өд” наадмаас тэргүүн шагнал хүртсэн билээ.