Б.ТУУЛ

Эрүүл мэнд, спортын дэд сайд Т.Болдбаатар энэ онд зохион байгуулагдах Дэлхийн оюутны спортын “Юниверсиад” наадмын асуудлаар Монголын оюутны спортын холбооны тэргүүн Д.Жаргалсайханыг хүлээн авч уулзлаа. Хоёр жил тутам зохион байгуулагддаг Дэлхийн оюутны спортын наадам “Юниверсиад” энэ  оны долдугаар дугаар сард БНСУ-ын Гванжу хотноо зохион байгуулагдах юм. 2015 оны оюутны Юниверсиад наадамд Монгол Улс 200 гаруй хүний бүрэлдэхүүнтэй баг оролцох бөгөөд нийт зохиогдох спортын 19 төрлөөс 14 төрөлд оролцоно гэдгийг Д.Жаргалсайхан салбарын сайдад дуулгав.  Тодруулбал, тус наадамд дэлхийн оюутан залуус волейбол, гимнастик(уран сайхны гимнастик), жудо бөх, сагсан бөмбөг, туялзуур жад, усан спорт, теннис, хөлбөмбөг, хөнгөн атлетик, ширээний теннис, байт харваа, бейсбол, бадминтон, гольф, гандбол, завь, буудлага, таеквандо зэрэг спортын төрлүүдээр уралдах юм байна. Мөн манай улсын баг тамирчид жудо, байт харваа, буудлага болон эрэгтэй сагсан бөмбөг, эмэгтэй волейбол зэрэг төрлүүдэд оролцохоор товлоод байгаа ажээ.

  Дэд сайд Т.Болдбаатар Монголын оюутны спортын холбооны санал, хүсэлтийг сонсож, дэлхийн оюутны спортын Юниверсиад наадамд оролцох Монголын баг тамирчдаа Эрүүл мэнд, спортын яамнаас дэмжин, цаашид хамтран ажиллахаа мэдэгдэв.  Тус наадамд Монгол улсаас 1965 онд анх удаагаа оролцож байжээ.

Эх сурвалж: Www.polit.mn