Б.ТӨГС

2015 оны төсвийн хуульд тодотгол хийж байна. Олон ч хүний дургүйг хүргэж байна. Энэ дундаа Хөрөнгийн албан татварын тухай хуульд өөрчлөлт оруулж орон сууцны татвар, авто машины татвар, бууны татвар, малын хөлийн татварыг бий болгож байгаа нь иргэдийн шүүмжлэлийг ихээр дагуулж байна. Гэхдээ Ч.Сайханбилэгийн Засгийн газар хэнээс ч гуйхгүйгээр амьдралаа залгуулан хөдөлмөрлөж байгаа жирийн иргэдээсээ хэмнэлтийг хийх гэж улайрч байгаа нь  дэндүү увайгүй харагдана. Нэг жишээ нь автомашины албан татварыг өөрчилсөн явдал. Тэрхүү өөрчлөлтөд өртсөн нь приус маркийн машин унадаг жолооч нар болоод байна. Приус машиныг хэн унадаг вэ. Шатахуун бага иддэг тул эдийн засгийн хямралтай өнөөгийн нийгэмд хамгийн тохиромжтой унаа болоод байна. Дээрээс нь утаа бага ялгаруулдаг эко машин хэмээн олон улсад хүлээн зөвшөөрөгдсөн. Гэтэл энэ машины татварыг гурав дахин нэмэгдүүлэх хуулийн төсөл явж байгаа нь шулуухан хэлэхэд нийгэмд байгаа олонхоос мөнгө босгож, шулах гэсэн ядсан арга гэхээс өөр яахав. Монголд  байгаа машинуудаас хамгийн олон тоотой нь приус. Тиймдээ ч приусчдээс мөнгө босгох амархан арга эрх баригчдын зүүдэнд гэнэт орсон бололтой. Олон мянган приусчдын хармааг тэмтэрч байхаар дарга, даамлуудын унадаг шатахууныг литр литрээр нь хүүлдэг бүдүүн машинуудыг приусээр сольчихвол жинхэнэ хэмнэлт нь тэр юм биш үү. Олон нийтийн сүлжээнд ч эсэргүүцэл идэвхтэй өрнөж байна. Приусчид жагсах цаг нь болсон бололтой.

Эх сурвалж: www.polit.mn