С.САРУУЛ

Нийслэлийн удирдлагын зөвлөлийн энэ оны анхны хуралдаанаар  “Нийслэлийн нутгийн захиргааны албан тушаалтнуудын уулзалт хийх тухай” журмын төслийг хэлэлцжээ.  Тус журам нь нийслэлийн нутгийн захиргааны байгуулллагын удирдах болон гүйцэтгэтгэх албан тушаалтнууд аливаа асуудлаар иргэнтэй уулзахдаа уулзалт зохион байгуулах шилэн хаалгатай, дүрс болон дуу бичлэг, компьютер техник тоног төхөөрөмжөөр тоноглогдсон тусгай өрөөнд уулзаж байхаар зохицуулж байгаа юм. Мөн тухайн уулзалтыг  бусдад харуулах байдлаар дэлгэц байршуулсан байх шаардлагатай аж. Энэ нь тухайн албан тушаалтан хүнд суртал гаргаж авилгад өртөхгүй, хэн нэгний нөлөөнд автахгүй байх зэрэг асуудлыг хянаж, зохицуулах боломжтой гэж үзэж байна.  Журамд уулзалтыг тусгай өрөөнд зохион байгуулах, уулзах хүсэлт гаргасан албан тушаалтан уулзах сэдвийн талаар тухайн уулзалтыг зохион байгуулах мэргэжилтэнд урьдчилан мэдэгдсэн байхаар зохицуулж байгаа юм. Хуваарьт уулзалт болон бусад уулзалтын үед шууд шийдвэрлэх боломжгүй асуудлыг хуулийн хугацаанд шийдвэрлэж иргэнд албан бичгээр хариу хүргүүлнэ. Уулзалтын дүн мэдээ, шийдвэрлэсэн асуудлын талаарх мэдээллийг нийслэлийн ЗДТГ-ын Нутгийн захиргааны удирдлагын хэлтэст нэтгэн улирал бүр Нийслэлийн удирдлагад танилцуулж байхаар заажээ. Эхний ээлжинд нийслэлийн ЗДТГ-ын нэгдүгээр давхарт уулзалтын тусгай өрөөг бэлтгэсэн байна.

Эх сурвалж: www.polit.mn