С.САРУУЛ

“Урт нэртэй” хуулийг батлуулах гэж  тэмцсэнийхээ төлөө “Гал үндэстэн” холбооны хэдэн хэдэн хүн буруудаж шүүхээс олон жилийн ял авсан.  Тэдний нэг болох С.Дашцэрэн өнгөрсөн сард хүнд өвчний улмаас нас барсан. Одоо Ц.Мөнхбаяр, Г.Болдбаатар, Д.Төмөрбаатар нар хоригдож байгаа юм. Эдгээр эх орончдыг суллахыг шаардаж “Гал үндэстэн” холбоо болон иргэний нийгмийн байгууллагууд сэтгүүлчдэд хандлаа. Тэд хүнийг амьдаар нь тамлах журам шоронд хэрэгжиж байгааг хэлсэн юм.  2002 оны Эрүүл мэнд, Хуульзүйн дотоод хэргийн сайдын хамтарсан тушаалаар  ялаас чөлөөлөх өвчний жагсаалт, хүнд өвчтэй ялтанд эмнэлэгийн бусад байгууллагын туслалцаа үзүүлэх журам баталжээ. Түүн дээр хоёр нүд сохрох, хоёроос дээш мөчний дунд үеэсээ тайруулсан, өмөнгийн гурав, дөрөвдүгээр үе туссан зэрэг тохиолдолд суллана гэсэн харгис журам мөрдөгдөж байгаа өөрөөр хэлбэл шоронгоос амьд гаргахгүй байх нөхцөл байдал үүсч байгааг онцоллоо. Тиймээс энэ журмыг өөрчлөхийн эсрэг тэмцэхээ уриалаад хэрэв дахиад нэг хүн өвчний байдлаас болж шоронд амиа алдах юм бол хатуу тэмцэнэ гэсэн юм. Энэ талаар тус хөдөлгөөний гишүүн Ц.Энхбаяр “Ялаас чөлөөлөх журамд заагдсан өвчин тусаад шоронгоос суллагдсаны дараа Монголын эмч нар эмчилж чадах юмуу. Шоронд хүнд өвчтэй хоригдож байгаа нөхдүүдэд эрсдэл учрах юм бол би буу барин тэмцэнэ. Тусгай салаанд ажиллаж байсан хүний хувьд  бүх зэвсгийг яаж ашигладгийг мэднэ, яаж дэлбэлдгийг мэднэ. Эх орончдыг шоронд үхүүлэх  гээд байгаан бол “Гал үндэстэн” холбооны хүмүүсээс төрийн ордны гадна цаазал” гэсэн юм.

Эх сурвалж: www.polit.mn