Ч.ГАНТУЛГА

Монголын сэтгүүлчдийн эвлэлээс уламжлал болгон зохиодог Сэтгүүлзүйн салбарын оны шилдгүүдийг шалгаруулах ёслолын ажиллагаа амжилттай болж өндөрлөлөө. Ард түмний дуу хоолой болж, шударга үнэний төлөө гэсэн уриатай ажилладаг сэтгүүлчид болон хэвлэл мэдээллийн байгууллагууд энэ өдөр ийн шилдгүүдээ шалгаруулсан юм. Энэ удаад хот болон орон нутгийн 50 гаруй хэвлэл мэдээллийн байгуулагын 55 сэтгүүлч, уран бүтээлчид өөрсдийн оюуны бүтээлээрээ өрсөлдлөө. Үүнээс оны шилдэг сониноор “Зууны мэдээ” сонин шалгарлаа. “Иргэдээ өмөөрч бичнэ” уриатай манай сонины хамт олон 2014 онд нийгэмд хандсан олон сэдвээр цуврал сурвалжлага, нийтлэл гаргасан нь ийн амжилт дагууллаа. Мөн тус сонины тоймч Б.Солонго “Гурван тэсийн улаан чулуу хүний аминд хүрч эхэллээ”, газар дээрээс нь хийсэн сурвалжлага, “Хүүхдэд зориулсан садар самуун” цуврал нийтлэлээрээ 2014 оны сонины шилдэг сэтгүүлчээр шалгарсан юм. Оны шилдэгийн шилдэг  сэтгүүлчээр “ТВ9” телевизийн “Монгол комент” нэвтрүүлгийн сэтгүүлч Б.Батбилэг, шилдэгийн шилдэг хэвлэл мэдээллийн байгууллагаар “Ньюс” агентлаг шалгарлаа.

Эх сурвалж: www.polit.mn