Д.АРИУН

Нийслэлийн МАН-ын хорооны дарга Ц.Сандуй шинэ оны өмнө намынхаа эмэгтэйчүүдийг баярлуулсан нэгэн шийдвэр гаргаснаа Нийгмийн ардчилал Монголын эмэгтэйчүүдийн холбооны арга хэмжээн дээр дуулгажээ. Тодруулбал, эмэгтэйчүүдийг дэмжих сан байгуулж, өөрөө хувиасаа 10 сая төгрөг хандивлаж байгаагаа зарлажээ. Ийм шийдвэр гаргах болсноо Ц.Сандуй дарга “Эмэгтэйчүүд мэдлэг боловсролоороо эрэгтэйчүүдээс дутахгүй. Гэтэл шийдвэр гаргах төвшинд улс төрд эмэгтэйчүүд өрсөлдөж гарч ирж чадахгүй байгаа нь хөрөнгө санхүүтэй холбоотой байдаг. Боловсролтой, мэдлэгтэй эмэгтэйчүүдийг улс төрд оруулж ирэхийн тулд тэднийг бодлогоор хөрөнгө санхүүгээр дэмжих хэрэгтэй байгаа тул ийм санаачилга гаргаж байна” гэж тайлбарлажээ. Мөн өөрийнхөө санаачилгыг дэмжихийг намынхаа эрчүүдэд уриалсан байна.

Нийслэлийн МАН-ын хорооны даргын улс төрд хүч үзэх мэдлэг боловсролтой бүсгүйчүүдийг дэмжинэ гэсэн энэ санаачилгыг намынх нь бүсгүйчүүд алга ташин хүлээж авч, Ц.Сандуйн санаачилгыг дэмжих дараагийн хүнийг битүүхэндаа харуулдаж байгаа гэнэ.

МАН 2012 оны сонгуулиар эмэгтэйчүүдийг дэмжих талд дээр ихээхэн хойрго хандсан бөгөөд намын жагсаалт эхэнд дандаа эрчүүд орж харин бүр хойгуур бүсгүйчүүдийнхээ нэрийг биччихсэн байсан.  Д.Оюунхорол, Д.Арвин нар тойргоос нэр дэвшин гарч ирсэн. Гэхдээ Д.Арвин сонгуульд ялангуутаа намаа сольж, АН-ын гишүүн болсон. Харин УИХ-ын гишүүнээс татгалзсан У.Хүрэлсүхийн оронд ТВ-5 телевизийн эзэн, сэтгүүлч Д.Сарангэрэл парламентад орж ирсэн билээ.

Эх сурвалж: www.polit.mn