Д.АРИУН

Шинэ оны босгон дээр буюу арванхоёрдугаар сарын 30-нд эрдэмтэд Чингисийн талбайд жагсаал хийж, Ерөнхий сайд Ч.Сайханбилэгийн  хүрээлэнгүүдийг их сургуулиудын харьяанд шилжүүлж, хэмнэлт хийх гэсэн бодлогыг эсэргүүцэж байгаагаа илэрхийлсэн.  Эрдэмтэд Ерөнхий сайдад шаардлага хүргүүлсэн бөгөөд “...Тэртээ тэргүй элгээр нь хэвтүүлчихээд байгаа шинжлэх ухааны суурь дэд бүтцийг их сургуулиудтай нэгтгэх нэрээр үрэн таран хийж устгаснаар хойч үедээ нөхөж баршгүй гай хурааж, Монгол Улсын оюуны чадавхийг хэдэн арван жилээо хойш татна” гэдгийг онцолж байсан юм.  Эрдэмтдийн дуу хоолой төр засгийн холбогдох хүмүүсийн чихэнд тэр дундаа Ерөнхий сайд Ч.Сайханбилэгийн сонорт хүрсэн бололтой. Засгийн газар эхний ээлжинд шинжлэх ухааны хүрээлэнгүүдийг их сургуулиудтай нэгтгэнэ гэдэг байр сууринаасаа ухарчээ. Харин хүрээлэнгүүдийг өөр хооронд нь нэгтгэх талаар судлаж үзэхээр болсон байна.

Хүрээлэнгүүдийг их сургуультай нэгтгэж байсан  бөгөөд үр дүнгийн тухайд тааруу гарсан гэдгийг эрдэмтэн судлаачид хэлж байгаа юм. Тодруулбал, МУИС-ийн харьяанд очсон хүрээлэнгүүд байгаа байхгүй нь мэдэгдэхээ больж, судалгаа шинжилгээний ажил гэдэг юм алга болсон гэнэ. Тиймээс их сургуулиуд сургалтын төлбөрөөр амиа аргацааж байгаа өнөөгийн нөхцөлд эрдэм шинжилгээний хүрээлэнгүүдийг харьяанд өгөх нь оновтой сонголт биш гэдгийг эрдэмтэд сануулж байгаа юм.