Шинэ жилийн баярыг угтан “Сод Монгол Групп” ХХК-иас Сонгинохайрхан дүүргийн Нэгдсэн эмнэлэгт тусламжийн хандивыг өргөсөн байна.

Энэхүү хандивын арга хэмжээнд “Сод Монгол Групп” ХХК-ийн төлөөлөл болон Сонгинохайрхан дүүргийн Нэгдсэн эмнэлгийн Ерөнхий эмч Б.Галсанцэдэн, эмч, эмнэлгийн ажилтнууд оролцсон юм.

“Сод Монгол Групп” ХХК-иас дөрвөн ширхэг ус цэвэршүүлэгч бэлэглэсэн нь эмч, эмнэлгийн ажилтнууд болон тус эмнэлгээр үйлчлүүлж буй иргэдэд ихэд таалагдсан юм.

Энэ үеэр Сонгинохайрхан дүүргийн Нэгдсэн эмнэлгийн Ерөнхий эмч Б.Галсанцэдэн “Манай эмнэлгийг зорьж ирсэнд баярлалаа. Байгууллага, хувь хүмүүс эмнэлгүүдэд боломжоороо хандив өгч тусламжийн гараа сургадаг танай компани, Ерөнхийлөгч Ц.Анандбазар танд тусгайлан талархаж буйгаа илэрхийлье.

Энэхүү хандив нь хэвтэн эмчлүүлэгчдэд маш их хэрэгтэй. Эмчлүүлэгч бүр ус буцалгагч авчирч хэрэглэдэг. Энэ нь цахилгааны хэрэглээг нэмэгдүүлэхээс гадна жаахан хүүхэд түлэгдэх эрсдэлтэй. Эдгээрээс сэргийлэх, бас соёлтой хэрэглээг ч дэмжих ач холбогдолтой юм” хэмээсэн. Түүнчлэн тус эмнэлгийн эмч, ажилтнууд “Сод Монгол Групп” ХХК-иас өргөж буй хандивыг талархан хүлээж авсанд “Сод Монгол Групп” ХХК-ийн хамт олон баяртай байгаагаа ч энэ үеэр илэрхийлж байв.

Э.Мөнх