ШШГЕГ-ын Нийслэлийн шүүхийн шийдвэр гүйцэтгэх газрын Хэлтсийн дарга бөгөөд ахлах шийдвэр гүйцэтгэгч, хошууч Б.Янжинлхамаас манай сонины редакид хаяглан бичиг ирүүлжээ. Учир нь, бид “Трафигура”-гийн Э.Жононбаярын талаар “Трафигурад 1.1 тэрбум долларын хохирол учруулсан гэх Э.Жононбаярын түншүүд нь улстөрчид биш биз” гэх зэрэг хэд хэдэн нийтлэл бичсэнд тэрээр гомдож шүүхэд хандсан. Шүүх хурал Баянзүрх, Сүхбаатар, Чингэлтэй дүүргийн иргэний хэргийн анхан шатны тойргийн шүүхийн 2025 оны арванхоёрдугаар сарын 8-ны шийдвэрээр “Нэхэмжлэгч Э.Жононбаярын нэр төр, ажил хэргийн нэр хүнд гутаагдсаныг сэргэж, уг мэдээг гаргасан хэлбэр, хэрэгслээр няцаалт хий” гэж даалгасан.

Нийслэлийн шүүхийн шийдвэр гүйцэтгэх газраас шүүхийн шийдвэр биелүүлж, Э.Жононбаярын нэр төр, ажил хэргийн нэр хүнд гутаагдсаныг сэргээж, энэхүү няцаалтыг хүргэхийг шаарджээ. Мөн улсын тэмдэгтийн хураамж, шийдвэр гүйцэтгэх ажиллагааны зардлыг “Голомт” банкны дансанд шилжүүлэхийг мэдэгджээ. Тиймээс, шүүхийн шийдвэрт дурдсанчлан нийтлэлүүдийн дараах хэсгүүдэд няцаалт гаргаж, Э.Жононбаярын нэр төр, ажил хэргийн нэр хүнд гутаагдсаныг сэргээж байна.

-Трафигурад 1.1 тэрбум долларын хохирол учруулсан гэх Э.Жононбаярын түншүүд нь улстөрчид биш биз гэх гарчиг бүхий нийтлэлд “Монголын улстөр, бизнесийнхэн Э.Жононбаяр гэдэг нууц ноёнтонтой болсон. Монголын улс төр, хууль хяналтын томчуудын халамж хамгаалалтад байдаг” гэх.

-Э.Жононбаяр керосин, нафта зэрэг нефтийн дайвар бүтээгдэхүүнийг оруулж ирэхэд анхаардаг. Э.Жононбаярын бизнесийг дэмжих шийдвэрийг Монголын төр дээд түвшиндээ бүгд шахам зүтгэж байж гаргаж өгдөг. Тухайлбал, 2023 оноос керосин, нафта зэрэг нефтийн бүтээгдэхүүнийг Монголд хаалтгүй, онцгой татваргүй оруулдаг болсон гэх.

-Э.Жононбаярыг салбар бүсийн захирлын үүрэгт ажлаас нь өнгөрсөн хавар чөлөөлжээ. Түүний тухайд 2012 оноос хойш “Трафигура”-гийн Монгол дахь захирлаар ажилласан гэх.

-“Трафигура”-гийн Монгол дахь салбар буюу Э.Жононбаяр нь ...бичиг баримтыг хуурамчаар үйлдсэн, “Трафигура” компанийн тогтоосноос хэтрүүлсэн мөнгийг төлсөн, улмаар Монголын нэр бүхий түншүүдтэй хийсэн гүйлгээний нарийн төвөгтэй сүлжээ үүсгэсэн гэж зарлажээ. Энэ бол фактад тулгуурласан дүгнэлт юм. Тэгэхээр Э.Жононбаяртай төвөгтэй сүлжээ үүсгэсэн түншүүд хэн бэ, улстөрчид үү гэдэг асуулт тавигдаж байна гэх.

-“Трафигура” групп 500 сая ам.доллараа Монгол Улсаас хайж байна. “Трафигура”-гийн Монгол дахь гол түнш “Лекс ойл” ХХК нь алга болсон 1.1 тэрбум ам.долларын өрийн хүлээн зөвшөөрсөн гэж байна. Шалгалтын явцад “Лекс ойл” ХХК нь талаас илүү буюу 600 ам.доллартай холбоотой болохыг тогтоожээ. “Лекс ойл” ХХК нь “Трафигура Монголы”-ыг хариуцаж байсан Э.Жононбаярын ойрын хамаарал бүхий компани юм. 2018-2023 онд “Трафигура Монгол”-ын Э.Жононбаярын талаар маш олон баримт Монголын хэвлэл мэдээллийн хэрэгслүүдээр нийтлэгдсэн. “Трафигура”-гийн 500 сая ам.доллар тансаглалд зарцуулагдсан уу. Монголын улстөрчдөд зарцуулагдсан уу гэж ярьж эхэллээ гэх.

-“Трафигура” групп Монголд 1.1 тэрбум доллараа алдсанаас болж ашгийн 62 хувийн алдагдал хүлээсэн үү гэх гарчиг бүхий нийтлэл.

-“Трафигура” групп Монголд 1.1 тэрбум доллараа алдаад “Трафигура Монгол”-ын Э.Жононбаярыг ажллаас чөлөөлжээ гэх гарчиг бүхий нийтлэл.

-Монгол Улс 1.1 тэрбум долларыг маань залгичихлаа гэж “Трафигура” дэлхийд зарлачихлаа, таг л байх уу гэх мэдээлэл.

-“Трафигура” Э.Жононбаяр нефтийн бүтээгдэхүүний импортоос гадна нефтийн бүтээгдэхүүний үйлдвэрлэл, уул уурхай, банк санхүү, үүрэн телефоны салбарт хөл тавьж байгаа талаар яригдсан. Дараа жагсаалт хүргэмз. Э.Жононбаярыг өргөжих тусам өнөө хэдэн улстөрч маань гар хөл нь болчихсон тууж яваа дуулдана гэх.

Дээрх хэсгүүдэд Э.Жононбаярын нэр төр, ажил хэргийн нэр хүнд гутаагдсаныг сэргээх шүүхийн шийдвэрийн дагуу энэхүү няцаалтыг хийж байна.

“Зууны мэдээ” сонины зөвлөл

Эх сурвалж: “Зууны мэдээ” сонин

2026 ОНЫ ЗУРГААДУГААР САРЫН 19. БААСАН ГАРАГ. № 116 (7858)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn