Хотын дарга Х.Нямбаатарын үед гаргасан хууль бус шийдвэр олон. Түүний нэг нь Сүхбаатар дүүргийн VIII хороо, “Дашчойлин” хийдийн баруун хойно байрлах Уламжлалт анагаах ухааны элэг судлалын клиник төвийн харьяа Эмийн үйлдвэрийн барилгын газрын асуудал байдаг. Хотын дарга байхдаа тэрээр тус газрыг “хүч түрэн” булаан авч, эмнэлгийн барилгыг албадан нурааж, газрыг нь "Эхлэл брэнд" ХХК-д дуудлага худалдаа нэртэйгээр өгчихсөн байдаг.  Хууль бус гэсний учир нь тус газар нь Улсын дээд шүүхийн эцэслэн гаргасан хоёр ч шийдвэртэй.   Түүнийг  хэрэгжүүлэлгүй, хууль бус шийдвэрүүдийг хотын удирдлагууд хүч түрэн гаргасан нь цаасан дээр хараар үлдсэн үнэн юм.  Тэгвэл анхнаасаа хуулиас даван өрөгдсөн энэ газарт өнөөдөр “Монастыр товэр” нэртэй орон сууцны хороолол сүндэрлэхээр  барилгын ажлаа эхлүүлээд байна.  Барилгын компанийн менежер гэх хүн “Дээд шүүхийн тогтоол байдаг гэж сонссон.  Бид Нийслэлийн Засаг даргын Тамгын газрыг дэмжих байдлаар оролцож байна. Бүүр муугаар бодоод дээд шүүхийн тогтоол хэрэгжвэл бид хохирохгүй, нийслэл хариуцлагаа хүлээнэ” гэсэн тайлбарыг хэвлэлд өгчээ.  УДШ-ийн шийдвэр эцсийнх бөгөөд хэрэгжих ёстой. Барилгын компани хохирохгүй бол нийслэл бүүр эцэстэй энэ барилгад захиалга өгөх иргэд хохирох вий. Дээд шүүхийн эцэслэн гарсан шийдвэр байхад хуулийн зөрчилтэй газар барилгын ажлыг эхлүүлж байгаа нь дахиад л хуулийн зөрчил болно гэдгийг сэрэмжлүүлэх нь зүйтэй.