Т.САЙХАН

Замын хөдөлгөөний аюулгүй байдлын тухай хуулийн нэмэлт өөрчлөлтийн дагуу ирэх сарын 1-нээс эхлэн скүүтэр, сурроныг унаж хөдөлгөөнд оролцохдоо автозамын зөвхөн баруун хөвөөгөөр зорчихоор боллоо. Уг хуулийн төслийг эцэслэн баталсан талаар хууль санаачлагч УИХ-ын гишүүн П.Батчимэг мэдээлэл хийлээ. Тэрээр "Цахилгаан тээврийн хэрэгсэл Монгол Улс төдийгүй олон улсад хурдацтай хөгжиж, өргөн хүрээг хамарч байгаа. Энэхүү хуулийг боловсруулах явцад Казакстан, Сингапур, Англи, Өмнөд Солонгос болон Австрали зэрэг улсуудад суррон, скүүтэрийг замын хөдөлгөөнд хэрхэн зөв боловсон оролцуулдаг талаар судалгаанд хамруулж авч ажилласан. Харин сүүлд судалгаанд хамрагдсан улсын нэг Казакстан улс байсан. Тухайн улсын хууль нь бидний хэрэгжүүлж буй хуультай хэрхэн уялдаа хамааралтай байгааг харьцуулж хэрэгжүүлсэн. Нөгөөтэйгүүр, уг хуулийг иргэд хүлээж байсан гэхэд хилсдэхгүй. Өнгөрсөн долоо хоногт ГССҮТ-өөс нэгдсэн мэдээлэл авахад 221 иргэн гэмтсэн албан мэдээллийг өглөө. Осол гэмтлийн тоо нэмэгдэж байгаагаас харахад суррон, скүүтэр явган зорчигчийн замаар хөдөлгөөнд оролцох ёсгүй гэдгийг статистик баталж байгаа юм. Уг хуулиар дамжуулан скүүтэр, сурроныг мопедын ангилалд оруулсан учир зөвхөн дугуйн замаар явна. Хэрэв дугуйн зам байхгүй тохиолдолд авто замын зорчих эгнээний баруун хөвөөгөөр хөдөлгөөнд оролцоно гэж тусгаж өгсөн.Нэг үгээр хэлбэл, мопедын ангилалд орсон учраас ирэх сарын 1-нээс хууль бүрэн хэрэгжинэ. Нийслэлд стандарт бүрэн хангасан зориулалтын унадаг дугуйн зам хангалтгүй байна. Үүнээс үзэхэд, дугуйн зам дээр ач холбогдол өгөхөөс гадна ирээдүйн хөгжлийг давхар тооцоолж ажиллаагүй иржээ. Уг хуулийн хэрэгжилтийг Улаанбаатар хотын Засаг дарга Б.Пүрэвдагва хариуцах юм. Харин хууль санаачлагчийн зүгээс стандартад хангасан унадаг дугуйн замын төсвийг төсөвт тусгаж өгөх тал дээр ажиллана гэдгийг хэлмээр байна. Замын хөдөлгөөний шинэчилсэн хуульд зааснаар суррон, скүүтэрийг 18 насанд хүрсэн иргэд унаж замын хөдөлгөөнд оролцох юм. Хэрэв хуульд заасан насны хязгаараас доош насны хүүхдүүд хэрэглэсэн нөхцөлд Зөрчлийн тухайн хуулиар хариуцлага оногдуулахаар болсон. Мөн тухайн хүүхдийн хууль ёсны асран хамгаалагч, эцэг эхэд 200 мянган төгрөгийн торгууль ногдуулах хуультай болж байна" гэлээ. 

Эх сурвалж:www.polit.mn