Т.САЙХАН

УИХ-ын чуулганы нэгдсэн хуралдаанаар Татварын ерөнхий хуульд нэмэлт, өөрчлөлт оруулах тухай хуулийн төслийн анхны хэлэлцүүлэгийг явуулж байна.

УИХ-ын гишүүн Д.Энхтүвшин: -Татварын үл маргах журмаар татварын данс хаагаад орлого татан төвлөрүүлдгийг 80 хувь болгож оруулж ирснийг, ажилчдын цалин нийгмийн даатгалтай холбоотой зардлыг нь ядаж үлдээх гэдэг байдлаар 70 хувь болгох зарчмын зөрүүтэй санал гаргасныг УИХ-ын гишүүд дэмжиж өгөхийг хүсч байна. 

УИХ-ын гишүүн Ц.Баатархүү: –Татварын хууль хамгийн сайн хэрэгждэг хууль гэж бодож байна. Татварын алба татвараа бүрдүүлэхийн төлөө данс хаадаг, татварын орлогын төлөө цаг наргүй ажиллаж байдаг. Гэхдээ нэг зүйл үүн дээр дутуу харагдаад байгаа. Үндэстэн дамнасан технологийн компаниудын дижитал үйлчилгээний татварын асуудлыг хэзээ оруулж ирэх юм бэ? Дэлхий даяар дижитал үйлчилгээний татварыг яах вэ гэдэг дээр бүгд шийдэл гаргаад явж байна. Монгол Улсад контент үйлдвэрлэж байгаа, дижитал үйлчилгээ үзүүлж байгаа компаниуд орлогынхоо татварыг өгөөд хууль тогтоомжийн хүрээнд үйл ажиллагаагаа явуулдаг. Гэтэл үндэстэн дамнасан компаниудын асуудлыг цаашдаа татварын бодлого яаж авч явах юм бэ? Иргэдээс зар сурталчилгааны шинжтэй, үйл ажиллагааны шинжтэй маш олон орлогыг татаж авдаг. Бид Монголбанкин дээрээс сар болгоны үндэстэн дамнасан технологийн компаниудын монголоос гарч байгаа долларыг харж байгаа. Гэтэл энэ орлогын татварт бүртгэгддэггүй. 

УИХ-ын гишүүн Х.Ганхуяг: –Ц.Баатархүү гишүүн маш зөв асуудлыг хөндөж байна. Бид энэ хуулийг батлагдсаны дараа УИХ-ын тогтоолыг гаргана. УИХ-ын тогтоол дээр төсөв өргөн барихдаа энэ асуудлыг хөндөж өргөн барих ёстой гэдэг байдлаар тогтоолд оруулъя" гэлээ. 

Эх сурвалж:www.polit.mn