Т. Батцэцэг

Орчин цагийн Шүүхийн шийдвэр гүйцэтгэх байгууллага үүсэж хөгжсөний түүхт 105 жилийн ойг тохиолдуулан “Монголын нүүдэлчдийн хууль цааз: Уламжлал, ял шийтгэл” сэдэвт эрдэм шинжилгээний хурлыг зохион байгуулав. Уг хурлыг Шүүхийн шийдвэр гүйцэтгэх ерөнхий газар (ШШГЕГ) болон Шинжлэх ухааны академийн Түүх, угсаатны зүйн хүрээлэн хамтран зохион байгууллаа. Хурлын гол зорилго нь нүүдэлчдийн хууль цаазын түүхэн бодлого, ял шийтгэлийн арга хэлбэрийг шинжлэх ухааны үндэслэлтэй судалж, түүхийн холбогдох эх сурвалжуудыг судалгааны эргэлтэд оруулахад чиглэжээ.

ШШГЕГ-ын Захиргааны удирдлагын газрын дарга, хурандаа Б. Нямгомбо хэлэхдээ,         "Орчин цагийн шүүхийн шийдвэр гүйцэтгэх байгууллагын 105 жилийн түүхт ой ирэх долоодугаар сард тохиож байгаа юм. Энэхүү эрдэм шинжилгээний хурал нь ойн хүрээнд зохион байгуулж буй хамгийн томоохон, ач холбогдолтой ажлуудын нэг юм. Манай байгууллагын түүхийн хувьд тодорхойгүй, нарийвчлан судлах шаардлагатай асуудлууд олон байдаг нь уг хурлыг зохион байгуулах гол шалтгаан болсон" хэмээн онцоллоо.

Глобал удирдагч их сургуулийн багш Г. Эрхэмбаяр хурлын үеэр ХVII зууны хууль цаазын судалгаагаар илтгэл хэлэлцүүлсэн юм.

Мөн тэрээр хэлэхдээ, "Манай улсад 1921 оноос өмнөх үеийн хууль цаазын судалгаа хөгжлийнхөө эхэн болон дунд шатанд явж байна. Энэ чиглэлээр дагнасан судлаачдын тоо арав хүрэхгүй байгаа ч хуулийн чиглэлээр сургалт явуулдаг 30 гаруй их, дээд сургуульд Монголын эрх зүйн түүхийн хичээл идэвхтэй ордог. Түүхч, эх бичгийн эрдэмтэд шүүхийн шийдвэр, ялын тогтолцоотой холбоотой илтгэлүүдийг анх удаа тусгайлан ялгаж, дагнан судалж байгаа нь энэ хурлын гол онцлог юм. Түүхэнд шүүхийн тогтолцоо ямар түвшинд байсан, ялыг хэн эдэлж байсан, үндсэн болон нэмэгдэл ялын ялгаа, гэмт хэргийн хүнд, хөнгөнөөс шалтгаалж ямар ял оноодог байсныг тодруулж байгаа нь маш сонирхолтой судалгаа болж байна" гэлээ. Эрдэм шинжилгээний хуралд оролцогчид Монголын эрх зүйн түүх болон түүхэн эх сурвалжуудыг гүнзгийрүүлэн судлах энэхүү санаачилгыг маш талархууштай хүлээн авч байгаагаа илэрхийлсэн юм.

Эх сурвалж:www.polit.mn