Т.САЙХАН

Эдийн засгийн байнгын хорооны хуралдаанаар Монголбанкны Тэргүүн дэд ерөнхийлөгчийн албан тушаалд Э.Анарыг томилохтой холбоотой нэр дэвшигчийн сонсголыг тавдугаар сарын 23-ны өдөр зохион байгуулахаар шийдвэрлэлээ. Тус сонсголыг УИХ-ын Төрийн байгуулалтын байнгын хорооны дарга, УИХ-ын гишүүн Б.Жавхлан удирдан явуулна. Э.Анар нь УИХ-ын дарга асан М.Энхболдын хүү бөгөөд төв банкны системд олон жил ажилласан, салбартаа хүлээн зөвшөөрөгдсөн мэргэжлийн боловсон хүчин юм. Монголбанк 2023 оны арванхоёрдугаар сараас хойш буюу хагас жил гаруйн хугацаанд Тэргүүн дэд ерөнхийлөгчгүй ажиллаж байгаа юм. Уг албан тушаалыг хашиж байсан Г.Дөлгөөн 2024 оны УИХ-ын сонгуульд нэр дэвшихээр ажлаасаа чөлөөлөгдсөнөөс хойш тус орон тоо эзэнгүй байв. Монголбанкны Тэргүүн дэд ерөнхийлөгчийн албан тушаалд өмнө нь тус банкны Тамгын газрын дарга асан Ж.Батхуягийн нэр яригдаж байсан ч, эцэст нь төв банкны системд олон жил ажилласан, салбарын туршлагатай хүнийг томилох нь зүйтэй гэж үзэн Э.Анарыг ийнхүү нэр дэвшүүлжээ.

Ажлын туршлага:

• Монголбанкны Төлбөр тооцооны газрын захирал

• Монголбанкны Төлбөр тооцоо, бүртгэлийн газрын захирал

• Хяналт шалгалтын газрын Зайнаас хяналт тавих хэлтсийн хянан шалгагч

• Валют, эдийн засгийн газрын Санхүүгийн зах зээлийн хэлтсийн нөөцийн мэргэжилтэн

Боловсрол:

• Японы Хакүо их сургууль, Бизнесийн удирдлагын чиглэлээр бакалаврын зэрэг
• АНУ-ын Колумбын их сургууль, Төрийн захиргаа, удирдлагын чиглэлээр магистрын зэрэг хамгаалжээ. 

Эх сурвалж:www.polit.mn