Б.Хулан
А.Санжмятавын "Аяллын жим: Гэгээн хутагтын замаар" хэмээх хоёр дахь боть номын нээлтийн үйл ажиллагаа өнгөрсөн бямба гарагт боллоо. Уг бүтээлд Хамба хутагтын үйл хэрэг, түүхэн ойг зохион байгуулж байсан үеийн гэрэл зураг, баримтууд болон “Богд хаан”-ы кино бүтсэн үйл явц түүхийн тухай багтжээ. Үйл ажиллагааг нээж "Аяллын жим: Гэгээн хутагтын замаар" зохиогч А.Санжмятав "Энэ номыг бүтээхэд маш олон хүний хөдөлмөр, зүтгэл, буян шингэсэн учраас олны хүртээл болгож, нээлтийг нь хийх хэрэгтэй гэж хамтран ажиллагсад маань зөвлөсөн юм. Ном маань дотроо таван бүлэгтэй. Өнөөдрийн үйл ажиллагаанд Хамба хутагтын XVIII дүр Данзан-Агваанчойдорж тусгайлан цаг гаргаж хүрэлцэн ирсэнд туйлын их баярлаж байна" гэв. Номыг бүтэхэд туслалцаа дэмжлэг үзүүлсэн найз нөхөд болон шашны зүтгэлтэн бүхий хүмүүст номынхоо дээжийг гардуулж дурсгалын зургаа татууллаа.
Нээлтэд уригдан ирсэн Хамба хутагтын XVIII дүр Данзан-Агваанчойдорж үг хэлж, баяр хүргэлээ. Тэрээр “Шашны уламжлалт ойлголтоор хутагт хувилгаан хүн өөрийн тавьсан ерөөл болон шавь олны ерөөл гэх хоёр хүчин зүйлийн дор эргэж төрдөг” болохыг дурдсан юм.
Хамба хутагт "Би 20 нас хүртлээ шашны номд элэгтэй явдаг байсан ч хутагт гэсэн мэдрэмжийг авч байгаагүй. Харин 2006 оноос эхлэн шавь олны хүсэл ерөөл биелж, энэ зүйл биед мэдрэгдэж эхэлсэн. Тэр цагаас хойш явсаар 2024 оны арваннэгдүгээр сарын 11-ний өдөр Далай багшаас хутагтын батламжаа гардаж авсан. Номын зохиогч маань 20 жилийн өмнөөс энэ үйл хэргийг эхлүүлж, намайг тодрох хүртэлх бүх ажилд оролцсон байна. Миний хувьд хамгийн үнэ цэнтэй дурсамж бол хутагтаар тодрох мөч байсан бөгөөд үүнийг ном болгон үлдээж байгаад баяртай байна"гэв. Мөн тэрээр уг бүтээлийг хойшдоо Хамба хутагт судлал болон дараа дараагийн хутагтууд тодроход судалгааны үнэтэй материал болно гэж үзэж байгаагаа илэрхийлж байлаа.
Эх сурвалж:www.polit.mn
