Ч.Бямбаа

Цөлжилттэй тэмцэх тухай НҮБ-ын конвенцын талуудын XVII бага хурал (COP17)-ыг 2026 оны наймдугаар сарын 17-28-ны өдрүүдэд Улаанбаатар хотод зохион байгуулахаар болсон. Тус хурлын үеэр гадаад, дотоодын нийт 10 мянга орчим төлөөлөгч оролцохоор байгаа бөгөөд үүнтэй холбоотойгоор замын хөдөлгөөний ачааллыг бууруулах зорилгоор хичээлийн шинэ жилийн эхлэх хугацаанд өөрчлөлт оруулах тухай асуудал яригдаж байгаа юм.

Ерөнхий боловсролын сургуулийн хичээлийн эхний өдрүүдийг цахим хэлбэрт шилжүүлэх, их, дээд сургуулиудын хичээл эхлэх хугацааг 1-2 7 хоногоор хойшлуулах хувилбарыг судалж байгаа талаар мэдээлэл гараад байсан. Энэхүү асуудлаар Боловсролын яамны Төрийн нарийн бичгийн дарга Т.Ням-Очир "Сургуулийн өмнөх болон ерөнхий боловсролын сургуулийн хичээлийн жилийн эхлэх, дуусах хугацааг хуулиар тодорхой зохицуулсан байдаг.  Боловсролын ерөнхий хуулийн 5-р зүйлийн 5.1-д хичээлийн жил есдүгээр сарын 1-нд эхэлж, зургаадугаар сарын 15-нд дуусна гэж заасан. Мөн хичээлийн жилийн үргэлжлэх хугацаа 170-185 хоног байна гэж хуульчилсан. Тиймээс цэцэрлэг, ерөнхий боловсролын сургуулиудын хувьд хичээлийн шинэ жил хуулийн дагуу эхлэх юм.

Магадгүй тухайн үед зарим байршил дээр байгаа сургуулиуд COP17 холбоотой зохицуулалтад орохыг үгүйсгэхгүй. Яг одоогийн байдлаар бидэнд тодорхой чиглэл ирээгүй байгаа ч шаардлагатай тохиолдолд цахим хэлбэрээр хичээллүүлэх, эсвэл тухайн өдрийн хичээлийг өөр өдөрт нөхөн зохион байгуулах зэрэг зохицуулалт хийхийг үгүйсгэхгүй юм. COP17 хурлыг зохион байгуулахтай холбоотой зарим зохицуулалтыг тухайн нөхцөл байдалд нь үндэслэн хэсэгчилсэн байдлаар хэрэгжүүлэхээр төлөвлөж байна” гэв.

Мөн их, дээд сургуулиудын тухайд хичээл эхлэх хугацааг есдүгээр сарын 15 эсвэл аравдугаар сарын 1-н  болгон өөрчлөх боломжийг судалж, холбогдох хэлэлцүүлгүүдийг өмнө нь хийжээ. Үүнээс гадна 3-4 курсийн оюутнуудын дадлагыг орон нутагт нь зохион байгуулах, 1-2 курсэд нь зайнаас болон танхимын хосолсон сургалтын хэлбэр ашиглах зэрэг хувилбаруудыг сургуулиудтай хамтран тооцоолж байгаа юм байна.

Эх сурвалж: www.polit.mn