Өнөөдөр /2026.06.04/-нд “Монастыр товэр” гэдэг компани барилгын танилцуулгаа хийх гэж байгаа тухай цахим орчинд зарлажээ. Хотын төвийн олон давуу талтай гэж өөрийгөө танилцуулсан энэхүү барилгын төслийн талаар сарын өмнө “Монастыр товэр” шүүхэд татагдсан талаар мэдээлэл цацагдаж байсан. Мөн түүнчлэн энэхүү барилгын төслийг эхлүүлж байгаа газар нь Улаанбаатар хотын дарга Х.Нямбаатарын үед гаргасан хууль бус ажлуудын нэгтэй холбогдож байгаа аж. Тодруулбал, Улсын дээд шүүхийн эцэслэн гарсан хоёр шийдвэрийг хотын дарга Х.Нямбаатар хэрэгжүүлэлгүй, хууль бус шийдвэрүүдийг хотын байгууллагуудаар гаргуулсан байдаг. Ингэснээр эмийн үйлдвэр байсныг нурааж, Х.Нямбаатар өөрөө лайвдаж байгаад дуудлагаар зарлаа гэж зарлаад байсан нь одоо энэ “Монастыр товэр” орон сууцны төсөл болчхоод явж байгаа юм байна. УДШ-ийн шийдвэр эцсийнх бөгөөд хэрэгжих ёстой. Тиймээс УДШ эцэслэн гарсан шийдвэр байхад наагуур нь хотынхон бужигнуулсан асуудал нь эргээд хуулийн зөрчилд хүргэж байгааг учир мэдэх эх сурвалж хэлж байна.
УИХ-ын Өргөдлийн байнгын хорооны хуралдаанаар өнгөрсөн сард гишүүд орон сууц захиалаад хохирсон иргэдийн тайлбар, мэдээллийг сонсож, уг асуудлыг шалган судалж, санал дүгнэлт гаргах, шаардлагатай бол шийдвэрийн төсөл боловсруулах үүрэг бүхий ажлын хэсгийг байгуулав. Өргөдлийн байнгын хорооны хурлын үеэр Хот байгуулалт, барилга, орон сууцжуулалтын яамны Салбарын хяналт шинжилгээ, үнэлгээ, дотоод аудитын газрын дарга Б.Найрамдал “Одоогийн байдлаар манай яаманд 52 төсөл дээр гомдол ирсэн. Тэдгээрийг судлаад үзэхэд барилга угсралтын ажил гүйцэтгэж байгаа 15, ажил удааширсан дөрөв, зогссон 15 төсөл байна. Ажил огт эхлээгүй, шүүхийн байгууллагаар хянагдаж байгаа тус бүр дөрвөн төсөл байна. Мөн шүүхийн шийдвэр гарсан хоёр төсөл байна” гэсэн юм. Тодруулбал энэ бүхний цаана иргэд хохирч байна гэсэн үг. Барилгын салбар дахь залилангийн асуудал УИХ-ын төвшинд хүрч, ноцтой яригдаж байгаа энэ үед хэрэглэгчид ч хохирохгүйн тулд хэрсүү байх ёстой цаг. Хаана, хэний барьсан ямар барилгад захиалга өгч авах нь хувь хүний эрх ч гэлээ эцэстээ хохирохгүйн тулд хуулийн зөрчилтэй эсэхийг шалгах тодруулах, баталгаа авах нь хэрэглэгчдийн хувьд хамгийн чухал гэдгийг сэрэмжлүүлэх нь зүйтэй.
Эх сурвалж:www.polit.mn
