Т.БАТЦЭЦЭГ

Монголын хүүхдийн ордон спорт цогцолборын барилгын их засварын ажил эхэлсэнтэй холбогдуулан энэ зуны сургалтын  үйл ажиллагаа явуулахгүй байхаар шийдвэрлэжээ. Сургалтын менежер Б. Санчирмаа “ 2025-2026 оны хичээлийн жилд урлаг, уран бүтээл, гадаад хэл, шинжлэх ухаан, лаборатори, спортын 24 төрлийн дугуйланд 4000 гаруй хүүхдийг хамруулж, мэргэжлийн чиг баримжаа олгох, чөлөөт цагийг нь зөв боловсон өнгөрүүлэхэд чиглэн ажилласан. Энэ жилийн гол онцлог нь НИТХ-ын шийдвэрээр анх удаа салбар дугуйлангуудыг хичээллүүлсэн явдал байв. Нийслэлийн долоон дүүрэгт салбаруудыг нээн уран зураг, дуулаач, драм, бүжиг, амьдрах ухаан зэрэг сургалтуудад үнэ төлбөргүй хүүхдүүдийг хамруулан ажилласан. Монголын хүүхдийн ордон нь жил бүр дотоодын болон гадаадын фестиваль, тэмцээн уралдаанд оролцож, Монгол улсынхаа өв соёл, уламжлалыг сурталчлан таниулдаг. Энэ жил тус ордны сурагчид шатар, найрал дуу, сонгодог хөгжмийн тэмцээнүүдэд амжилттай оролцсон бөгөөд тун удахгүй Япон, Турк, Солонгос, Хятад, Орос улсуудыг зорин олон улсад эх орноо төлөөлөн оролцоно” гэлээ.

 Монголын хүүхдийн ордны спорт цогцолборын барилгын засварын ажил тавдугаар сарын 29-ний өдрөөс эхэлсэн бөгөөд барилгын их засвартай холбоотойгоор энэ зуны сургалт, үйл ажиллагааг явуулахгүй. Ирэх намраас илүү өргөн цар хүрээтэй, олон төрлийн дугуйлангаар хүүхэд багачуудаа шинэчлэгдсэн орчинд хүлээн авахаар бэлтгэл ажлаа хангаж байгаа юм байна.

Эх сурвалж:www.polit.mn