К.АНУ

Ази тивийн аялал жуулчлалын салбарын хөгжлийн чиг хандлага, бодлого тодорхойлогчдын хамгийн том уулзалтуудын нэг болох 15 дахь удаагийн “Азийн аялал жуулчлалын форум” (ATF-2026) ирэх 2026 оны зургаадугаар сарын 11-13-ны өдрүүдэд Улаанбаатар хотноо зохион байгуулагдах гэж байна.

Энэ удаагийн форум “Зочлох үйлчилгээ, аялал жуулчлалын Азийн парадигм” сэдвийн хүрээнд болох бөгөөд Азийн улс орнуудын эрдэмтэн судлаачид, бодлого боловсруулагчид, аялал жуулчлалын салбарын мэргэжилтнүүдийг нэг дор цуглуулах онцлогтой.

Форумыг Монгол Улсын Соёл, спорт, аялал жуулчлал, залуучуудын яам, Нийслэлийн Аялал жуулчлалын газар, Аялал жуулчлалын мэргэжлийн холбоо болон Hong Kong Polytechnic University хамтран зохион байгуулах юм.

1993 онд анх суурь нь тавигдсан тус форум нь аялал жуулчлалын салбарын тогтвортой хөгжлийг дэмжих, олон улсын хэмжээнд судалгаа, туршлага солилцох, хамтын ажиллагааны сүлжээ бий болгох зорилготой аж. Мөн маркетинг, менежментийн шинэлэг шийдэл, бүс нутгийн хөгжлийн асуудлуудыг хэлэлцдэгээрээ онцлогтой.

Форумын хүрээнд:

-Хиймэл оюун ухаан, үйлчилгээний робот, дижитал шилжилт зэрэг технологи, инновац;

-ESG буюу байгаль орчин, нийгэм, засаглалын тогтвортой бодлого;

-Соёлын, эрүүл мэндийн, байгалийн болон хөдөө орон нутгийн аялал жуулчлал;

-Боловсрол, менежмент, зорин очих газрын маркетинг зэрэг сэдвээр эрдэм шинжилгээний илтгэл, хэлэлцүүлгүүд өрнөнө.

“Азийн Аялал Жуулчлалын Форум” өмнө нь Индонез, БНХАУ, Өмнөд Солонгос, Франц зэрэг 12 улсад 14 удаа зохион байгуулагдсан бөгөөд хамгийн сүүлд 2024 онд Палембанг хотод болсон байна.

Эх сурвалж: Polit.mn