Т.САЙХАН
Нийслэл дээр өрнөж буй тендерийн хулгайтай холбоотой асуудлаар шалгагдаж байгаа нэгэн бол НИТХ-ын төлөөлөгч Б.Сэргэлэнбаатар. Түүнийг өөрийн хувь эзэмшлийн “Професионалстрой” ХХК-иараа дамжуулан “Сэлбэ дэд төв“-ийн 197.6 тэрбумын тендерт шалгарч санхүүжилт авсан байж болзошгүй асуудлаар хуулийн байгууллага шалгаж, гэрт нь нэгжлэг хийн 48 цагийн хугацаанд цагдан хориод сулласан. Б.Сэргэлэнбаатар суллагдсаныхаа дараа НИТХ-ын дарга А.Баярыг огцруулах хуралдаанд оролцож, “Манай гэрийг хуулийнхан бүтэн нэгжсэн. Хайсан юмаа олсон эсэхийг мэдэхгүй байна. Би хамт нэгжсэн” гээд хээв нэг хариулт өгөөд зогсож байгаа харагдсан. Түүнийг цагдан хорьсон асуудлаар АТГ-аас мэдээлэхдээ “Сэлбэ хорин минутын хот” төслийн хүрээнд зарласан “Сэлбэ дэд төвийн орон сууцны иж бүрэн цогцолбор хороолол /71 айлын 9 давхар барилга, 6 блок 71 айлын 12 давхар, 8 блок/ Багц 4.2 төсөл арга хэмжээ”-г сонгон шалгаруулахдаа хууль зөрчсөн байж болзошгүй гэх гэмт хэргийн талаарх мэдээллийг хүлээн авч, хянан үзээд хэрэг бүртгэлтийн хэрэг нээн шалгаж байна. Дээрх тендер шалгаруулалтад сонгон шалгарсан “Професионалстрой” ХХК-ийн 30 хувийн хувьцаа эзэмшигч, Нийслэлийн ИТХ-ын төлөөлөгч Б.Сэргэлэнбаатар, тус компанийн 70 хувийн хувьцаа эзэмшигч Ш.Мөнхсайхан нарыг прокурорын зөвшөөрлөөр Эрүүгийн хэрэг хянан шийдвэрлэх тухай хуулийн 31.5 дугаар зүйлийн 1.3 дахь хэсэгт заасан үндэслэлээр 2026 оны 4 дүгээр сарын 25-ны өдөр 48 цагийн хугацаагаар баривчилсан ба мөрдөн шалгах ажиллагааг үргэлжлүүлэн явуулж байна" гэсэн байдаг.
2020 онд НИТХ-ын төлөөлөгчөөр сонгогдсон Б.Сэргэлэнбаатар нь одоо мөн Төв аймгийн МАН-ын даргын ажлыг давхар хашдаг. Тэрээр 2016-2017 онд Сонгинохайрхан дүүргийн "Тохижилт, цэвэрлэгээ, үйлчилгээ" ОНӨААТҮГ-ын дарга, 2016 онд УИХ-ын Тамгын газарт гишүүний зөвлөх, 2018 онд нийслэлийн МАН-ын хорооны хэлтсийн дарга, 2019 онд НИТХ-ын Ажлын албаны ХМОНХТ-ийн дарга, Монголын залуучуудын холбооны Ерөнхийлөгчөөр зурвас ажиллан 2020 онд НИТХ-ын төлөөлөгчөөр сонгогдсон байна.
Эх сурвалж:www.polit.mn
