Т.САЙХАН

УИХ-ын гишүүн Д.Энхтүвшинд Эрүүгийн хуулийн 11.6-д заасан "Хүний эрүүл мэндэд хөнгөн хохирол санаатай учруулах" гэмт хэрэгт буруутгаж, яллагдагчаар татах саналыг Сүхбаатар дүүргийн цагдаагийн газраас Нийслэлийн прокурорын газарт хүргүүлсэн байна. Түүнийг 2026 оны дөрөвдүгээр сарын 1-ий өдөр Нийслэлийн Засаг даргын нэгдүгээр орлогч Т.Даваадалайг Төрийн ордонд хуралд оролцож байхад нь дуудаж гаргаж ирээд дэгээдэж унагаасан үйлдэл нь хэвлэл мэдээллийн байгууллагуудын дүрс бичлэгт үлдсэн. Тэгвэл үүссэн асуудлыг цагдаагийн байгууллага шалгаад хүний эрүүл мэндэд хөнгөн хохирол санаатай учруулсан гэж үзсэн байна. Энэ талаар мөн Нийслэлийн орлогч Т.Даваадалай "Төрийн ордонд гишүүнд мөргүүлж тархиндаа хөнгөн гэмтэл авсан" гэж мэдэгдэв. Харин УИХ-ын гишүүн Д.Энхтүвшин Т.Даваадалайгийн биед халдсаныхаа дараа "Т.Даваадалай даргаас хүлцэл өчье. Хотыг төлөөлж ирж байгаа удирдлагуудын хандлагаас болж ёс зүйгүй үйлдэл гаргалаа" гэж мэдэгдсэн юм.

Эрүүгийн хуулийн 11.6 дугаар зүйл.Хүний эрүүл мэндэд хөнгөн хохирол санаатай учруулах гэмт хэрэгт

1.Хүний эрүүл мэндэд хөнгөн хохирол санаатай учруулсан бол дөрвөн зуун тавин нэгжээс нэг мянга гурван зуун тавин нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ.

2.Энэ гэмт хэргийг энэ хуулийн 10.1 дүгээр зүйлийн 2 дахь хэсэгт заасан хүндрүүлэх нөхцөл байдалтайгаар үйлдсэн бол дөрвөн зуун тавин нэгжээс хоёр мянга долоон зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас зургаан сар хүртэл хугацаагаар зорчих эрхийг хязгаарлах ял шийтгэнэ.

Эх сурвалж:www.polit.mn