Хотын даргын шийдвэр маргаан дагуулж эхэлжээ. Хотын дарга Х.Нямбаатарын “Өмчөө буцаан авлаа” гэх мэдэгдлийн цаана гурван шатны хүчин төгөлдөр шүүхийн шийдвэртэй эмийн үйлдвэрийн газрыг хүч хэрэглэн булаан авч, барилгыг нураан, дуудлага худалдаагаар зарсан гэх ноцтой асуудал үүсээд байна. Өөрөөр хэлбэл Уламжлалт анагаах ухааны Элэг судлалын клиник төвийн талд гарсан гурван шатны шүүхийн хүчин төгөлдөр шийдвэр байсаар байхад тухайн эмийн үйлдвэрийн газрын эрхийг өөр этгээдэд шилжүүлсэн гэх ноцтой маргаан юм. Уг маргаантай газарт “Эхлэл Групп”-ийн хэрэгжүүлж буй “Monestery Tower” барилгын төсөл эхэлж, захиалга авсаар байгаа нь асуудлыг улам хүндрүүлж, олон нийтийн анхаарлын төвд ороод байна.Тус маргаан Нийслэлийн захиргааны хэргийн анхан шатны шүүхийн шатанд хэлэлцэгдэж байгаа бөгөөд хотын захиргаанаас гаргасан хүсэлтийн дагуу удаа дараа хойшлогдсоор хэрэг хянан шийдвэрлэх ажиллагаа жил гаруйн хугацаанд үргэлжилж байгаа юм. Улмаар шүүхээс “Monestery Tower” төсөл хэрэгжүүлэгчийг гуравдагч этгээдээр татан оролцуулах шийдвэр гаргасан нь уг төсөл өөрөө маргааны төвд орсныг илтгэж байна. Ийм нөхцөлд маргаан эцэслэн шийдэгдэхээс өмнө барилгын төсөл эхлүүлж, захиалга авах нь гүйцэтгэгч болон иргэдэд санхүүгийн бодит эрсдэл үүсгэж болзошгүй юм. Тиймээс шүүхийн шийдвэр гартал барилгын төслийг түр зогсоох, гэрээ байгуулах, захиалга авах, төлбөр хүлээн авахыг хориглох шаардлага үүсээд байна. Маргааны хүрээнд хотын удирдлагаас гаргасан шийдвэрүүд, ялангуяа Х.Нямбаатарын үед гарсан захиргааны шийдвэрүүд нь өмнөх шүүхийн шийдвэртэй нийцэж байгаа эсэх асуудал анхаарал татаж байна. Хэрэв эдгээр нь шүүхийн эцсийн шийдвэртэй зөрчилдөж байгаа нь тогтоогдвол холбогдох шийдвэрүүдийг хүчингүй болгох, барилгын төслийг зогсоох, учирсан хохирлыг тогтоох зэрэг ноцтой эрх зүйн үр дагавар үүсэх юм. Одоогоор уг хэрэг шүүхийн шатанд хянан хэлэлцэгдэж байгаа бөгөөд дараах гол асуудлуудын хүрээнд эцэслэн шийдвэрлэгдэхээр байна. Үүнд: • Газрын эрх шилжүүлсэн үйл явц хуульд нийцсэн эсэх • Захиргааны шийдвэрүүд нь хууль зүйн үндэслэлтэй эсэх • Болзошгүй ашиг сонирхлын зөрчил байгаа эсэх Иймд шүүхийн эцсийн шийдвэр гартал холбогдох үйл ажиллагааг хязгаарлах, гаргасан захиргааны шийдвэрүүдийг нягтлан шалгах шаардлага зүй ёсоор тавигдаж байна. Энэ хэрэг хэрхэн шийдвэрлэгдэх нь цаашид ижил төрлийн маргаанд хууль, шүүхийн шийдвэрийг хэрхэн хэрэгжүүлэх жишиг тогтоох ач холбогдолтой юм.

Эх сурвалж:www.polit.mn