Т.САЙХАН

Төрийн байгуулалтын байнгын хорооны хуралдаанаар  УИХ-ын тухай хуульд өөрчлөлт оруулж, УИХ-ын дарга нь намын гишүүнчлэлээс түдгэлздэг байх хуулийн төслийг хэлэлцэн дэмжлээ. Энэ талаар гишүүд хууль санаачлагчаас асуулт асууж хариулт авав. 

УИХ-ын гишүүн Б.Батбаатар: -Энэ хуульд оруулж байгаа өөрчлөлтөөр өөр дуу хоолой нээгдэхгүй юм байна. МАН, АН-ын төлөөлөл уулзаад энэ хуулийг батална гэж байна. Өөр намууд оролцож, ярилцсан юм уу. Тэгээд 5 намын дуу хоолой болно гээд байдаг. Мөн энэ хууль чинь С.Бямбацогтод зориулж орж ирж байна. Ц.Нямдоржийг УИХ-ын дарга байхад намын гишүүнчлэлээс татгалз гэхэд “татгалзлаа гээд яах вэ намаараа л үлдэнэ” гэж хариулж байсан. Хэрэв үнэхээр сонгодог парламент руу явъя гэж байгаа бол Ерөнхий сайд нь УИХ-аа тараадаг байж болохгүй юу. Дээрээс нь бүлэгт харьяалагдаагүй гишүүд гээд байдаг. Завсарлага авах эрх байхгүй. УИХ-ын дарга нь нам бус байлгавал дэд дарга нараа нам бус болгох юм уу. 5 намын төлөөллөөс оролцуулаад ойлголцоод цааш явах ёстой.

УИХ-ын гишүүн, хууль санаачлагч Х.Тэмүүжин: Үндсэн хууль дээр УИХ-ын даргыг гишүүд дотроосоо ил санал хурааж сонгоно. Дэд дарга нарыг нам, эвслийн бүлгүүд сонгоно гэж заасан. УИХ бол хүссэн хүсээгүй 126 гишүүнээс бүрдэж байгаа боловч нэр дэвшилтээс болж намаас хамааралтай байдаг. Хэлэлцэхийг нь дэмжээд ажлын хэсэг байгуулаад явах нь гишүүдийн бүрэн эрх гэлээ. 

Эх сурвалж:www.polit.mn