Т.САЙХАН

АН долоо хоног бүрийн пүрэв гарагт хийдэг "4:11 мэдээллийн цаг" хэвлэлийн хурлаа хийлээ. Өнөөдрийн хуралд АН-ын дарга О.Цогтгэрэл, УИХ-ын гишүүн Д.Ганбат, С.Цэнгүүн нар оролцож, цаг үеийн улс төрийн нөхцөл байдал, УИХ дахь АН-ын бүлгээс санаачилж байгаа ажлуудын талаар, орон даяар явагдсан АН-ын дотоод сонгуулийн үр дүн зэрэг асуудлаар мэдээлэл өгсөн юм. АН-ын дарга О.Цогтгэрэл "АН-ын тавьж байгаа зүй ёсны шаардлага бодитой үндэслэлтэй болох нь улам бүр батлагдаж байна. УИХ-ын чуулган хоёр дахь долоо хоногтоо хуралдахгүй байна. АН 42 гишүүнтэй. Эрх баригч намын 68, хамтарсан намуудыг нэмээд 80 гишүүн бий. Хурлаа бүрэн дүүрэн зохион байгуулаад явах боломжтой. 80 гишүүнтэй эвсэл хурлаа хийж чадахгүй байна гэдэг нь АН-ын шаардлага зүй ёсных гэдгийг, МАН-ын дарга Н.Учрал УИХ-ын индрээс буу гэдэг шаардлага зөв гэдгийг УИХ-ын олонх үзсэн байна. Энэ шаардлагыг МАН-ын дарга биелүүлэх ёстой гэдгийг хатуу хэлье. Хэрэв чөлөөлөгдөх ёстой гэдэг зарчмын шаардлагыг хүлээж авахгүй бол бид огцруулах арга руу орно. Сүүлийн үед гарч байгаа хулгай, авлигын асуудал үнэхээр цочирдом болж байна. 110 сая, 200 сая ам.долларын авлига эзэн биетэй, цаг хугацаатайгаар нь албан тушаалтай хүмүүс өгч байна. Мэдээллийг нууцад авах замаар хулгай хийх боломжийг олгож байсан. Үүнийг шалгах ёстой хууль хяналтын байгууллага нь таг дуугүй, Хууль зүй, дотоод хэргийн сайд нь тогтолцооных нь нэг хэсэг болоод хувирчихлаа. Энэ намын дарга нь парламентыг удирдаад сууж байгаа нь буруу гэдэг нь харагдаж байна.АН-ын бүлгээс өнгөрсөн хугацаанд ажил хэргийн ярилцлагууд хийж байна. Д.Ганбат гишүүн эвсэл хамтралд ороогүй Үндэсний эвсэлтэй хамтраад УИХ дээр нээлттэй сонсгол зохион байгуулах ёстой гэж үзэж байна.Энэ мафийн нэг хэсэг болсон Хууль зүй, дотоод хэргийн сайд яаралтай ажлаа өгч, шалгуулах ёстой. Мөрдөн шалгах ёстой байгууллагыг удирдаж байгаа сайд, дэд сайд нар ажлаа өгч, шалгуулж, үнэн зөвийг тогтоолгох ёстой. 110 сая ам.доллар гэдэг 400-аад тэрбум төгрөг. Гэтэл үүнийг авлигач, хулгайч нар хувааж авсан гээд ярьж байна. Энэ бол 100 сумын нэг жилийн төсөв. АН-ын бүлэг зарчмын шаардлага дээрээ хатуу байгаа. Хэрэв энэ чигээрээ үргэлжилбэл чөлөөлөх биш огцруулах гарын үсэг цуглуулна" гэлээ. 

Эх сурвалж:www.polit.mnn