Т.САЙХАН

Ерөнхий сайд асан, УИХ-ын гишүүн Л.Оюун-Эрдэнэ Хууль зүй, дотоод хэргийн сайд Б.Энхбаяртай холбоотой авлигын асуудлыг шалгуулахаар өнөөдөр (03.23)Авлигатай тэмцэх газарт хүсэлт гаргаснаа мэдээллээ. УИХ-ын гишүүн Л.Оюун-Эрдэнэ "Өнөөдөр би нийт 894 хуудас материалыг бэлтгэн Авлигатай тэмцэх газарт хүлээлгэн өгөх гэж байна. Нэгдүгээрт, "Бодь"-той холбоотой оффтейк гэрээний асуудал, хоёрдугаарт, нүүрсний сонсголтой холбоотой асуудлууд, гуравдугаарт, Б.Энхбаярын авлигын шинжтэй байж болзошгүй асуудлууд болон холбогдох гэрч, нотлох баримтууд, дөрөвдүгээрт, Б.Энхбаяртай холбоотой бусад авлигын асуудлуудыг тус тус багтаан дөрвөн бүлэгт хуваасан болно.  Нүүрсний сонсгол эхэлсэн цагаас Б.Энхбаяр сонсголын дундуур маш их өөрчлөгдсөн.  Б.Энхбаяр нь "Бодь Интернэшнл" ХХК-ийн захирал Д.Баясгалантай хоёр хүний хамт дөрвүүлээ уулзах үеэрээ нэг удаад 500 мянган ам.доллар, дараагийн удаад 800 мянган ам.доллар буюу нийт 1.3 сая ам.долларыг бэлнээр авсан байж болзошгүй талаар мэдээлэл байна" гэлээ.  Мөн тэрээр "ХЗДХ-ийн дэд сайд Д.Мөнх-Эрдэнэтэй холбоотойгоор "Д.Мөнх-Эрдэнийг ЗГХЭГ–ын тэргүүн дэд даргаар томилогдсон өдрөөс хойш би ажиглаж эхэлсэн. Түүний хувьд  Голомт  банканд хуулийн зөвлөхөөр ажиллаж байсан. Мөн Л.Отгонбаяртай хамтарч  "Солонго Мөнх партнерс" ХК болон "Легал Линк Си Би Эй" ХК–аар дамжуулан "Тавантолгой төмөр зам" компаниас зөвлөх үйлчилгээний нэрээр нийт 11 тэрбум төгрөгийн санхүүжилт авсан байж болзошгүй талаар дурдагдаж байна. Түүнчлэн Д.Мөнх-Эрдэнэ нь Б.Энхбаяртай ойрын харилцаатай бөгөөд томилгооны хүрээнд энэ холбоо нь батлагдаж байна гэж үзэж байна. Улмаар хууль зүйн холбогдох асуудлуудыг шийдвэрлэхэд нөлөөлсөн байж болзошгүй гэж хардаж байна гэлээ. 

УИХ-ын гишүүн  Л.Оюун-Эрдэнийн мэдээлэлтэй холбоотойгоор ХЗДХ-ийн сайд Б.Энхбаяр өөрийн цахим хуудастаа тайлбар бичжээ.  Тэрээр "Нэг байсан гэрч нь дөрөв боллоо, 1.5 сая нь 1.3 сая ам доллар боллоо, Бодийн тараасан авлига нь бүр 110 сая ам доллар гэнэ үү.  Эрх бүхий байгууллагууд хурдтай шалгаж мухарлах ёстой" гэжээ. 

Эх сурвалж:www.polit.mn