Д.МАРАЛ
Гэрэл зургийг Л.НОМИНГЭРЭЛ
“Соёмбо” уран бүтээлийн нэгдлийн санаачилгаар зохион байгуулж буй “Бид өвлөн дуулна” ардын богино дуу дуулаачдын өсвөрийн олон улсын анхдугаар уралдааны талаар тус уран бүтээлийн нэгдлийн гүйцэтгэх захирал, Гавьяат жүжигчин С.Нэргүй, АЖ дуучин Ц.Үенч, МУГЖ Ц.Чулуунцэцэг, Гавьяат багш Я.Алтансувд нар “Үндэсний мэдээллийн төвд” мэдээлэл хийлээ.
Аливаа үндэстний үүсэж хөгжсөн түүхийн нэгэн хэсэг нь уламжлалт соёл бөгөөд энэ соёлын салшгүй хэсэг нь ардын урлаг юм. Тэрээр МУГЖ С.Нэргүй хэлэхдээ “Ардын гэсэн тодотголтой бүхэнд мартагдахын аюул байдаг тул ардын урлагт бие сэтгэлээ зориулж байгаа уран бүтээлчид нэгдэн ардын богино дууг судлан сэргээж хүүхэд багачууддаа таниулахыг зорьлоо” гэсэн юм.
Уралдааныг гоцлол, хамтлаг төрлөөр гурван үе шаттай явуулах бөгөөд 6-9, 10-13, 14-17 гэсэн насны ангилалаар өрсөлдөх юм. Тус уралдааны дэлгэрэнгүй мэдээллийг “Соёмбо” уран бүтээлийн нэгдлийн албан ёсны пэйж хуудаснаас авах боломжтой юм. Танхимын шалгаруулалтаас шалгарсан хүүхдүүдийг финалын шатанд өрсөлдүүлж шилдгүүдийг насны ангилал бүрээс тодруулахын зэрэгцээ хүүхдүүдээ бэлтгэж оролцуулсан шилдэг багш нарыг ч шалгаруулна гэлээ.
Эх сурвалж: zms.mn
